И К О С 3

Радуйся, преподобная мати Марфо, предивная всех страждущих утешительнице.

К О Н Д А К 2

Видяще Господь тя девицу, во вся дни в темныя одежды одеянную, и душу твою, в ризу непорочности облеченную, украси тя дарами Духа Святаго, да вси, зряще души твоея доброту, воспоют Жизнодавцу Богу:

Аллилуия.

И К О С 2

Разум Божественный просвети отроковицу, егда всех в дому матери твоея Правоверию и почитанию Творца всяческих научила еси, по кончине же матери твоей наставницей ищущих спасения соделалася еси, мы же, дивящеся таковому о тебе Божию смотрению, воспеваем ти сице:

Радуйся, братьям и сестрам твоим материю бывшая;

радуйся, в попечениях о славе храмов Божиих пожившая.

Радуйся, к Матери Божией в молитвах притекавшая;

радуйся, и ближних твоих сему присно наставлявшая.

Радуйся, любовь ко иноческой жизни в отрочестве показавшая; радуйся, и крест наставницы с голубиною кротостью приявшая.

Радуйся, сестру свою на тесный путь монашества направившая; радуйся, обитель дев в Кирсанове с нею основавшая.

Радуйся, преподобная мати Марфо, предивная всех страждущих утешительнице.

К О Н Д А К 3

Силою свыше осеняемая, была еси приходящим к тебе за советом яко богомудрая учительница и наставница. Тем же мнози, суету земную отвергши и твоими молитвами чин ангельский приявшии, воспеша дивному во Святых Своих Богу:

Аллилуия.

И К О С 3

Имела еси велию любовь ко обителям Божиим, преподобная мати, странствия ко святым местам со усердием совершала еси, и тамо во умилении сердца молитвы ко Господу пламенне возносила еси. Мы же, прославляюще Бога, даровавшего нам таковую предстательницу, вопием ти сице:

Радуйся, во кротости и смирении Агнцу-Христу подражавшая; радуйся, яко мудрая дево елей благодатный собравшая.

Радуйся, век земной в странствиях ко святым местам проведшая; радуйся, Небесного Отечества искавшая и того обретшая.

Радуйся, путь в обители Небесные нашедшая через

терпение; радуйся, в горний Иерусалим многих препровождение.

Радуйся, влечение души своея ко иноческой жизни показавшая, радуйся, Всемилостивую Владычицу непрестанно призывавшая.

Радуйся, преподобная мати Марфо, предивная всех страждущих утешительнице.

К О Н Д А К 4

Бури соблазнов житейских и сладостей мира сего избежала еси, и во граде Киеве с именем Маргариты во ангельский чин облеклася еси, тем же Мир Божий в сердце свое приявши, просвещаема Духом Святым, взывала ко Господу-Началу всех начал:Аллилуя.

И К О С 4

Слышаше людие, ангелоподобное житие твое, преподобная мати Марфо, прихождаху к тебе со упованием, и совет благоразумен получивши, весть о таковей споспешнице разнесоша. Сего ради община твоя растяше и умножахуся. Мы же благодаряще Бога воспеваем ти сице:

Радуйся, от юности сердце свое Небесному Жениху обручившая; радуйся, в делах милосердия и любви к ближним пожившая.

Радуйся, дары Духа Святаго бдением и говением умножавшая; радуйся, яко многим христианом примером ставшая.

Радуйся, яко и ныне болезнующих душею и телом приемлеши; радуйся, яко вся козни бесовския от душ наших отъемлеши.

Радуйся, всех, сущих в скорби и нужде, принимавшая;

радуйся, в житии твоем никогоже без помощи оставлявшая.

Радуйся, преподобная мати Марфо, предивная всех страждущих утешельнице.

КОНДАК 5

Боготечною звездою возсияла еси в стране Тамбовстей, преподобная мати Марфо, и явилася еси воистину безсребреницей, егда приносимые тебе злато и дары благодарных людей, раздавала бедным и в нуждах сущим, поучая домашних своих: ”Милосердный Бог и по милостыням от грехов избавляет…”. Темже, благодаряще Человеколюбца Бога, даровавшаго нам таковую наставницу, воспеваем Ему:

Аллилуия.

И К О С 5

Видевше людие богоспасаемого града Кирсанова в тебе дивную попечительницу богадельни дев-тружениц возрадовашеся, яко мнози благоговейнии девицы обретоша зде тихое душеспасительное пристанище, провождая вся дни свои в служении Богу и ближним. Сего ради воспеваем ти сицевая:

Радуйся, змия прелести в житии твоем поправшая;

радуйся, в подвигах жизни духовныя сестер твоих утверждавшая.

Радуйся, святых Жен-мироносиц служению подражавшая; радуйся, любви к ближнему паче всего взалкавшая.

Радуйся, наставнице ко спасению верная; радуйся, звездо милосердия, на небо восшедшая, светлая.

Радуйся, град Кирсанов дивною обителью украсившая; радуйся, иго заповедей Христовых на себе восприимшая.

Радуйся, преподобная мати Марфо, предивная всех страждущих утешительнице.

КОНДАК 6

Проповедана бе святость жития твоего, богоблаженная мати, егда ты провинности слуг принимала на себе, свобождая таковых наказания, тем измлада Христу уподоблялася еси, понесла бо грехи людские на раме своем, научая нас пети Искупителю- Богу:

Аллилуия.

ИКОС 6

Возсиявый в сердце твоем свет истиннаго богоразумия настави тя, преподобная мати Марфо, в странствиях и бдениих, наипаче же в милостынях и говениих жительствовати, просвещая и нам тернистый путь духовнаго восхождения к славе небесней, да и мы, взирая на подвиги твоя, чистым сердцем воззовем ти:

Радуйся, славу земную и суету мирскую презревшая;

радуйся, настоятельство сестре своей отдавшая.

Радуйся, путь монашества равноангельно прошедшая; радуйся, благую часть на пути сем обретшая.

Радуйся, странствия по святым местам возлюбившая; радуйся, во обителех святых христианскому подвижничеству поучившаяся.

Радуйся, в сонме преподобных жен на Небеси прославленная; радуйся, народа Божия заступнице милостивая и неослабная.

Радуйся, преподобная мати Марфо, предивная всех страждущих утешительнице.

КОНДАК 7

Хотящи волю Господню исполнити, ученицу свою любимейшую Татьяну призвавше, и Именем Божиим ю заклинавше, руководительство над сестрами понудила еси прияти, научая Зиждителю Богу умиленно воспевати:

Аллилуия.

ИКОС 7

Новое чудо на тебе яви Господь, егда предрекла сестрам своим: «В Кирсанове монастырь будет», дар пророчествия сим показуя и веру в сердцах малодушных укрепляя, темже маловерныя и заблудшия наставляла еси, являющи в себе дивные дела Промыслителя-Бога, сего ради воспеваем ти сицевая:

Радуйся, славу Божию нам являющая; радуйся, делами своими Творца прославляющая.

Радуйся, печалей наших утолительнице; радуйся, скверн душевных благая очистительнице.

Радуйся, яко болезнующих и страждущих присно приемлеши; радуйся, яко мир от Господа душе скорбящей даруеши.

Радуйся, ногам разслабленным крепость даровавшая;

Радуйся, чадородием жен праздных возвеселявшая.

Радуйся, недугов всяческих безмездная врачевательнице; радуйся, кающихся грешников пред Богом благая предстательнице.

Радуйся, преподобная мати Марфо, предивная всех страждущих утешительнице.

КОНДАК 8

Странное чудо видевше сестры обители Кирсановския, егда ты, весть о своем скором отшествии получивше, заповедала еси им в трудах терпеливыми быти и правил послушания не оставляти, но во всяких нуждах Матерь Божию призывати:”Она ваша покровительница…”и, вручив их покрову Пречистыя Девы, во град Тамбов поспешила еси. Темже и мы, преподобная мати, Премудрость Божию в тебе явленную зряще, воспеваем Богу Аллилуия.

ИКОС 8

Вся в молитвах слезных к Богу пребывала еси, мати Святая. Егда приближися час успения твоего, на Новолетие Господом уготованного, гласом архангельскаго обрадования взывала еси: «Богородице Дево, радуйся…», тем же осени чудесный облак тя, из онаго же виден бысть Спаситель, благословляющий десницею тя, умирающую. Благочестивыя же людие со иереи издалече стекахуся ко гробу твоему. Сего ради и мы, преклоньше колена сердец наших, благоговейное пение ти приносим:

Радуйся, пред кончиною твоею Славою Божественною сиявшая; радуйся, от светлаго юноши ветвь чудесную пред кончиною приявшая.

Радуйся, неисчетные чудеса по успении своем явившая; радуйся, новый источник благодати на кладбище Крестовоздвиженском открывшая.

Радуйся, со всеми святыми ныне пребывающая; радуйся, со ангелы на небесех Господа воспевающая.

Радуйся, в чертозех небесных веселящаяся; радуйся, у Престола Божия присно о нас молящаяся.

Радуйся, преподобная мати Марфо, предивная всех страждущих утешительнице.

КОНДАК 9

Всяк возраст и всяко сословие прославляет немыслимыя подвиги твоя, мати Марфо. Сестры же, приуготовляюще тя к погребению, узреша веригами и крестом великим отягченное тело твое. И мы, грешнии, восхваляюще тя, оковами железными оковы греха препобедившую, с благоговением и трепетом воспеваем Подвигоположнику всех – Спасу Христу:

Аллилуия.

ИКОС 9

Ветии многовещаннии не возмогут достойно воспети силу любве твоея, преподобная, юже ныне являеши в чудесех исцелений и скорых вспоможениих, подаваемых всем, с верою приходящим к усыпальнице твоей. Темже, прославляюще прославльшаго тя Господа, вопием ти таковая:

Радуйся, не плоть свою, но ближняго возлюбившая;

радуйся, и по отшествии твоем изрядно людем послужившая.

Радуйся, Духа Святаго дивное селение; радуйся, стяжавшая ко Господу дерзновение.

Радуйся, во пиянстве утопающих скорое взыскание; радуйся, усердно Богу служащим пречудное величание.

Радуйся, Тамбовския страны неусыпная печальнице; радуйся, Святителя Питирима усердная на Небесех сомолитвеннице.

Радуйся, преподобная мати Марфо, предивная всех страждущих утешительнице.

К О Н Д А К 10

Спасти хотящи многие люди от соблазнов вражиих, не оставляеши нас вразумленьми твоими. Се бо некоему святотатцу дерзкому на пути явилася еси, и камень надгробный, им унесенный, возвратити на место повелела еси. Да вси, с верою к тебе припадающе и камень сей лобызающе, сподобятся твоея скорой защиты и помощи, воспевая Источнику всех чудес Богу:

Аллилуия.

И К О С 10

В стену необоримую, крепость и заступление обители Кирсановской даровася еси, святая икона Пресвятыя Богородицы «Тихвинская», ею же ты сестер своих благословила еси, повелевая им во всяких нуждах Царицу небеси и земли призывати. Темже восхваляюще верную служительницу и послушницу Пречистыя Владычицы, вопием ти сице:

Радуйся, Всемилостивой Владычице похвалы воспевательнице; радуйся, Ея святых обителей умиленная почитательнице.

Радуйся, Всепречистей Деве чистотою жизни твоея подражавшая; радуйся, Ея Пресвятым именем козни вражии побеждавшая.

Радуйся, икону Богоматери «Тихвинскую» в благословение сестрам твоим оставившая; радуйся, Небесную Царицу делами своими прославившая.

Радуйся, под кровом Божия Матери в радости ныне пребывающая; радуйся, яко не гнушатися нами многогрешными Ея умоляющая.

Радуйся, преподобная мати Марфо, предивная всех страждущих утешительнице.

К О Н Д А К 11

Пение всеумиленное с благодарностью приносят ти тамбовстии людие, от бед, скорбей, напастей и болезней молитвами твоими избавлении. Аще и попустит нам праведный Господь скорби некии грех наших ради, со упованием сердечным и надеждою на скорое твое пред Богом ходатайство воспоем Ему:

Аллилуия.

И К О С 11

Светолепною зарею возсия нам житие твое, богомудрая Марфо, тем же молва людская привождаху ко усыпальнице твоей всих, чающих утешения в скорбех и благодатной помощи в болезнех: никогоже ты безутешна оставила еси. Сего ради вопием ти сице:

Радуйся, твердостию веры твоея Церковь Христову укрепляющая; радуйся, храбрая воительнице, мечем молитвы демонов посецающая.

Радуйся, на Христовой любви семейств благочестивых устроение; радуйся, от детоубийства многих жен отвращение.

Радуйся, от клеветы и суда неправедного защитительнице; радуйся, всех во вражде сущих умирительнице.

Радуйся, песочком с могилки твоей кровотечение некой жене остановившая; радуйся, единственнаго сына бедной вдовы от тяжкого недуга исцелившая.

Радуйся, слез детских скорое осушение; радуйся, вдов и сирот от всяких нужд избавление.

Радуйся, преподобная мати Марфо, предивная всех страждущих утешительнице.

К О Н Д А К 12

Благодати исполненный сосуд явилася еси, преподобная мати Марфо, юже изливаеши изобильно на всех, чтущих память твою и ко гробу твоему с верою притекающих; темже и мы, грешнии, припадающе молимтися: не остави нас, в земней юдоли странствующих, без помощи твоея и попечения, просяще Господа помиловати всех, вопиющих Ему:

Аллилуия.

И К О С 12

Поюще многая твоя явления и заступления, преподобная мати Марфо, прославляем Бога, даровавшего нам тебе, якоже тихую пристань в море житейском, да вси, по водам его преплавающие, зде обретут Мир Христов и покой душам своим, воспевая ти благодарным сердцем:

Радуйся, всех обидимых к себе приводившая; радуйся, находящияся в духовном разсеянии воедино соединившая.

Радуйся, земное поприще достойно прошедшая; радуйся, от Царя Небеснаго венец славы приемшая.

Радуйся, неисповедимыми судьбами Божиими прославленная; радуйся, народом Божиим без почитания не оставленная.

Радуйся, многия духовныя радости нам принесшая; радуйся, сладкоуханным крином в земли Тамбовстей процветшая.

Радуйся, преподобная мати Марфо, предивная всех страждущих утешительнице.

К О Н Д А К 13

О, святая преподобная мати Марфо, вериги и крест железныя на себе носившая, приими и нас грешных моление сие, тебе приносимое, и огради ны от наветов духов тьмы, оковами страстей нас обдержащих, избави нас от суеверия и идолопоклонства, церковных нестроений, всяких бед и напастей; умоли Вседержителя Бога силу и крепость подати нам, да, вземше крест свой, во след Христу грядем, поюще Ему:

Аллилуия, аллилуия, аллилуия.

Далее читается Икос 1 и Кондак 1.

ТРОПАРЬ, гл. 4

Возсиявши Божественною благодатию,/ чистоту жития твоего по смерти явила еси;/ источаеши бо любовь свою нам неослабно,/ ограждая от вреда и всякаго зла,/ с верою притекающих ко святому гробу твоему,/ во дни нашедших на ны скорбей и печалей;/ Преподобная мати Марфо,/ моли милостивого Бога / грехов оставление нам даровати.

К О Н Д А К глас 3-й

Тамбовскую молитвенницу почтим,/ тая бо от Бога даровася всем;/ яко Ангел на земли была еси,/ ко спасению многих подвигая,/ сего ради утешительницей прославилася еси,// яко споспешница Божия благодати.

Величание:

Ублажаем Тя, Преподобная мати Марфо,

И чтим святую память твою, ты бо молиши за нас Христа

Бога нашего.

О, Преподобная мати Марфо, ангельски на земли пожившая и ныне со Ангелы небесных благ вкушающая, у Престола Божия душею предстоящая, и за всех нас неотступно ходатайствующая. Сего ради и мы, недостойнии, предстоящи на месте твоего погребения и вся подвиги твоя воспоминающе, молимся ти: Призри чистым сердцем своим на нас, многими грехми оскверненных и плодов покаяния не принесших, но милосердием Божиим до конца не изгибших.

Се взываем к тебе, приими прошения наша и принеси их ко Престолу Отца Небесного, яко дерзновение к Нему имущая. Испроси всем притекающим к тебе вечное спасение, грехов оставление, на благая дела щедрое благословение, в злостраданиях кротость и терпение, от всяких бед и зол скорое избавление.

Моли Господа нашего и Творца младенцы и юные в вере, целомудрии и богобоязненности воспитати, болящим исцеления даровати, пастыри в ревности крепостию Святаго Духа утвердити, Церковь в единстве, Отечество наше Россию- в мире, и Правую Веру в чистоте сохранити. Яко да, твоими молитвами наставляеми и соблюдаеми, достигнем в вечный покой без преткновения, и купно с тобою прославим Бога, в Троице славимаго, Отца и Сына и Святаго Духа, ныне и присно и во веки веков. Аминь.