Духовная грамота великого князя Ивана Даниловича Калиты

Подлинники на пергамене Около 1339 г.

а) Первый вариант

Во имя отця и сына и святаго духа, се аз, грешный худыи раб божии Иван, пишу душевную грамоту, ида в Ворду, никимь не нужен, целымь свомь умом, в своемь здоровьи. Аже бог что розгадаеть о моемь животе, даю ряд сыном своим и княгини своей.

Приказываю сыном своим очину свою Москву. А се есмь им роздел учинил:

Се дал есмь сыну своему болшему Семену: Можаеск, Коломъну со всими Коломеньскими волостми, Городенку, Мезыню, Песочну, Похряне, Усть-Мерьску, Брошевую, Гвоздну, Ивани, деревни Маковець, Левичин, Скул нав, Канев, Гжелю, Горетову, Горки, село Астафьевьское, село на Северьсце в Похрянъском уезде, село Костянтиновское, село Орининьское, село Островьское, село Копотеньское, селце Микульское, село Малаховьское, село (Напрудское у города.

А при своемь животе дал есмь сыну своему Семену: 4 чепи золоты, 3 поясы золоты, 2 чаши золоты с женчуги, блюдце золото с женчугомь с каменьемь. А к тому еще дал есмь ему 2 чума золота болшая. А ис судов ис серебрьных дал есмь ему 3 блюда серьбрьна.

А се даю сыну своему Ивану: Звенигород, Кремичну, Рузу, Фоминьское, Суходол, Великую свободу, Замошьскую свободу, Угожь, Ростовци, Окатьева свободка, Скирмияовьское, Тростна, Негуча. А села: село Рюховьское, село Каменичьское, село Рузьское, село Белжиньское, село Максимовское, село Андреевское, село Вяземокое, село Домонтовьское, село в Замошьскои свободе, село Семициньское.

А из золота дал есмь сыну своему Ивану: 4 чепи золоты, пояс болшии с женчугомь с каменьемь, пояс золот с капторгами, пояс сердоничен золотом окован, 2 овкача золота, 2 чашки круглый золоты; блюдо серебрь- но ездниньское, 2 блюдци меншии.

А се дал есмь сыну своему Андрею: Лопастну, Се-верьску, Нарунижьское, Серпохов, Нивну, Темну, Голичичи, Щитов, Перемышль, Растовець, Тухачев. А се села: село Талежьское, село Серпоховьское, село Колбасиньское, село Нарьское, село Перемышльское, село Битяговокое, село Труфоновское, село Ясиновьское, село Коломниньское, село Ногатиньское.

А из золота дал есмь сыну своему Андрею: 4 чепи золоты, пояс зол от фрязьскии с женчугомь с каменьемь, пояс золот с крюкомь на червчате шелку, поясъ золот царевьскии, 2 чары золоты, 2 чумка золота меньшая; а из блюд,— блюдо серебрьно, а 2 малая.

А се даю княгини своей с меншими детми: Сурожик, Мушкову гору, Радонежское, Бели, Воря, Черноголовль, на Вори свободка Софроновокая, Вохна, Деиково ра­менье, Данплищова свободка, Маш^в, Селна, Гуслиця, Рамень«, что было за княгинею. А села: село Михаиловское, село Луциньское, село у озера, село Радонежское, (ч-ло Двигуниньское, село Тыловское, Рогожь, село Протлсьевское, село Аристовьское, село Лопастеньское, село Михаиловское на Яузе, 2 селе Коломенскии.

А из городьских волостии даю кн-ишнн своей осмничее. А тамгою и иными волостми городьокими поделятся сынове мои; та ко же и мыты, который в котором уезде, то тому. А оброкомь медовымь городьскимь Василцева веданья поделятся сынове мои. А что моих бортников и оброчников купленых, который в которой росписи то того.

А по моим грехом, ци имуть искати татарове которых волостии, а отоимуться, вам, сыном моим, и княгини моей поделите вы ся опять тыми волостми на то место.

А численыи люди, а те ведають сынове мои собча, а блюдуть вси с одиного. А что мои люди куплении в великомь свертце, а тыми ся поделять сынове мои.

А что золото княгини моее Оленине, а то есмь дал дчери своей Фетиньи, 14 обручи и ожерелье матери ее, монисто новое, что есмь сковал. А чело и гривну, то есмь дал при собе. А что есмь придобыл золота, что ми дал бог, и коробочку золотую, а то есмь дал княгине своей с меншими детми.

А ис порт из моих сыну моему Семену: кожух черленыи женчужьныи, шапка золотая. А Ивану, сыну моему: кожух желтая обирь с женчугомь и коць великии с бармами. Андрею, сыну моему: бугаи соболии с наплечки с великимь женчугомь с каменьемь, скорлатное портище сажено з бармами. А что есмь нынеча нарядил 2 кожуха с аламы с женчугомь, а то есмь дал меньшим детем своим, Марьи же Федосьи, ожерельем.

А что моих поясов серебрьных, а то роздадять по попьям. А что мое 100 руб. у Ески, а то роздадять по церквем. А что ся остало их моих судов из серебрьных, а тым поделятся сынове мое и княгини моя. А что ся останеть моих порт, а то роздадять по всим попьям и на Москве. А блюдо великое серебрьное о 4 колдя, а то есмь дал святей Богородици Володимерьскои.

А приказываю тобе, сыну своему Семену, братью твою молодшую и княгиню свою с меншими детми, по бозе ты им будешь печалник.

А что есмь дал сыну своему Семену стадце, а другое Ивану, а иными стады моими поделятся сынове мои и княгини моя.

А на се послуси: отець мои душевьныи Ефрем, отець мои душьвным Федосии, отець мои душевьныи поп Давыд.

А грамоту писал дьяк князя великого Кострома.

А кто сю грамоту порушить, судить ему бог.

На лицевой стороне грамоты привешена серебряная позолоченная печать великого князя Ивана Даниловича Калиты.

б) Второй вариант

Во имя отця и сына и святаго духа, се яз грешный худыи раб божии Иван, пишу душевную грамоту ида в Ворду, никимь не нужен, целымь своимь умомь, в своемь здоровьи. Аже бог что розгадаеть о моемь животе, даю ряд сыном своим и княгини своей.

Призываю сыном своим очину свою Москву. А се есмь им роздел учинил:

Се дал есмь сыну своему болшему Семену: Можаеск, со всими волостьми, Коломну со всими Коломеньскими волостьми, Городенку, Мезыню, Песочну, и Середокоротну, Похряне, Усть-Мерьску, Брошевую, Гвоздну, Ивани, деревни Маковець, Левичин, Скулиев, Канев, Гжелю, Горетову, Горки, село Астафьевское, село на Северьсце в Похряньскомъ уезде, село Костянтиновьское, село Орининьское, село Островьское, село Копотеньское, селце Микульское, село Малаховьское, село Напрудьское.у города.

А при своемь животе дал есмь сыну своему Семену: 4 чепи золоты, 3 поясы золоты, 2 чаши золоты с женчюги, блюдце золото с женчюгомь с каменьем, 2 чума колота большая. А ис судов ис серебрьных дал есмь ему 3 блюда серьбрьна.

А се даю сыну своему Ивану: Звенигород, Кремичну, Рузу, Фоминьское, Суходол, Великую свободу, Замошькую свободу, Угожь, Ростовци, Окатьеву свободку, Скирминовьское, Тросну, Негучю. А села: село Рюховьское, село Каменичское, село Рузьское, село Белжиньское, село Максимовское, село Андреевское, село Вялемьское, село Домонтовское, село в Замошьскои сво­боде, село Семциньское.

А из золота дал есмь сыну своему Иваиу: 4 чепи золоты, пояс золот болшии с женчюгомь с каменьемь, пояс золот с капторгами, пояс сердоничен золотомь окован, 2 овкача золота, 2 чашки круглый золоты, блюдо (требрыю ездниньское, 2 блюдци меншии.

А се дал есмь сыну своему Андрею: Лопастну, Сенсрьску, Нарунижское, Серпохов, Нивну, Темну, Голичичи, Щитов, Перемышль, Растовец, Тухачев. А се села: село Талежьское, село Серпоховьское, село Колбасиньское, село Нарьское, село Перемышльское, село Битя- говьское, село Труфоновьокое, село Ясиновьское, село Коломнинское, село Ногатиньское.

А из золота дал есмь сыну своему Андрею: 4 чепи золоты, пояс золот фразьскии с женчюгомь с каменьемь, пояс золот с крюкомь на чьрвьчате шелку, пояс золот царевьскии, 2 чары золоты, 2 чумка золота меншая; а изь блюд,— блюдо серебрьно, а два малая.

А се даю княгини своей с меншими детми: Сурожик, Мушкову гору, Радонежьское, Бели, Боря, Черноголовль, на Бори свободка Софроновьская, Вохна, Деи- ково раменье, Данилищова свободка, Машев, Селна, Гуслиця, Раменье, что было за княгинею. А села: село Михаиловьское, село Луциньское, село у озера, село Радонежьское, село Деигуниньское, село Тыловское, Рогожь, село Протасьевское, село Аристовокое, село Лопастеньское, село Михаиловское на Яузе, 2 селе Коломеньскии.

А из городских волостии даю княгини своей осмничее. А тамгою и иными волостми городскими поделяться санове мои; тако же и мыты, который в которого уезде, то тому. А оброкомь городскимь Василцева веданья поделяться сынове мои. А что моих бортников и оброчников «упленых, который в которого росписи, то того.

А по моим грехом, ци имуть искати татарове кото­рых волостии, а отьшмуться, вам, сыном моим, и кня­гини моей поделити вы ся опять тыми волостми на то место.

А числьныи люди ведають сынове мои собча, а блюдуть вси с одиного. А что мои люди куплении в великом свертце, а тыми ся поделять сынове мои.

А что золото княгини моее Оленино, а то есмь дал дчери своей Фетиньи, 14 обручи и ожерелье матери ее, монисто новое, что есмь сковал. А чело и гривну, то есмь дал при собе. А что есмь придобыл золота, что ми дал бог, и коробочку золотую, а то есмь дал княгини своей с меншими детми.

А ис порт из моих сыну моему Семену: кожух черленыи женчужныи, шапка золотая. А Ивану, сыну мое­му: кожух желтая обирь с женчугомь, коць великим с бармами. Андрею, сыну моему: бугаи соболии с наплечки с великимь женчюгомь с каменьем, скорлатное портище с бармами. А что есмь нынеча нарядил 2 ко­жуха с аламы с женчюгомь, а то есмь дал меншим детем своим, Марьи же Федосьи, ожерельем.

А что моих поясов серебрьных, а то роздадять по попьям. А что мое 100 руб. у Ески, а то роздадять. по церквам. А что ся остало из моих судов из серебрьных, а тым поделяться сынове мои и княгини моя. А что ся останеть моих порт, а то роздадять по всим попьям и на Москве. А блюдо великое о 4 колця, а то даю святей Богорюдици Володимерскои.

А то есмь дал сыну своему Семену стадце, а другое Ивану, а иными стады моими поделятся сынове мои м княгини моя.

А прочь Московских сел, даю сыну своему Семену села своя купленая: село Аваковское в Новегороде на Улале, другое в Володимери Борисовское.

А что есмь купил село Петровское, и Олексиньское, Вседобричь, и Павловьское на Масе, половину есмь ку­пил, а половину есмь сменил с митрополитом... ця на Масе, что есмь купил у Афинея, то даю сыну своему Ивану.

А то есмь купил село Варварьское и Меловьское у Юрьева, что есмь сменил на Матфеищовьское село, го даю сыну своему Андрею.

А что село Павловское, бабы нашее купля, и Новое селце, что есмь купил, и Олександр святыи, что есмь купил на Костроме, то даю княгини своей.

А что есмь купил село в Ростове Богородичское, а дал есмь Бориску Воръкову, аже иметь сыну моему которому служити, село будет за нимь, не иметь ли служити детем моим, село отоимут.

А что есмь прикупил селце на Коржачи у Прокофья у игумна, другое Леонтневское, третье Шараповское, а то даю святому Олександру собе в поминанье.

А приказываю тобе, сыну своему Семену, братью твою молодшую и княгиню свою с меншими детми, по бозе ты им будешь печалник.

А кто сю грамоту порушит, судить ему бог.

А на се послуси: отець мои душевный Ефрем, отець мои душевный Федосии, отець мои душевный, поп Давыд.

На обороте листа помета: Духовные, и списки з ду­ховных, и прошная грамота.

На лицевой стороне грамоты след от прикрепления печати.

Духовные и договорные грамоты великих и удельных князей XIV—XVI вв. М.—Л., 1950, № 1.