Слово ответно противу клевещущих истинну еуангельскую

И о иноческом житии и устроении церковном

<...> Господь же рече: Аще хощеши съвершен быти, иди и про­дай имениа твоа и даждь а нищим, и прииди и последуй ми. Сиа краткыя глаголы опасне[32] являют иноческое житие; в трех сих съборнейших главизнах съобьемлющи и прочаа вся съставляющаа иноческое житие, рекше, нищету, милостыню и всякое братолюбие и състрадание, к симь же и молитву непрестанну с воздержанием и бодростию. Аще хощеши, рече, съвръшен быти, а не в полу съвершен. Что же есть еже съвръшен быти? Сам Спас инде[33] научи, рек: Бывайте съвершении, яко же отець вашь небесный съвершен есть. <…>

Господь убо[34] глаголеть: Продай же убо имениа твоа. Мы же наша или убо устраяем по заповеди господьской, или ни? Таже в манастырь вшедше, от неразумиа нашего, чюжаа не преставаем всяким образом себе пристяжавати — и села и имениа, ова[35] убо безстудне[36] у вельмож ласканием прошаще, ова же искупующе. Таже господье бывша чюжих имений чрез заповедь, велику правду непщуем[37] и добродетель, еже тщатися всегда умьножити сиа. И глаголавшаго нестяжанием во вслед его поити, и нищетою и правдою, и сего забывше, и вместо еже безмолъствовати и рукоделием своим и трудом питатися, по заповеди, градов безпрестани обьеждаемь и в ру­ках богатых взираем, разным образом ласкающе их и рабо­лепне угаждающе им, даже и возможемь приати у них или деревнишку, или сребришко.

Господь повелевает: И даждь я нищим. Мы же единаче сребролюбием и несытостию побежденыи, живущаа братиа наша убогиа в селех наших различным образом ос­корбляем их, истязанми неправедными обидяще их, и лесть[38] на лесть и лихву[39] на лихву на них налагающе, милость же ни­где же к ним показуем; их же егда не возмогуть отдати лихвы, от имений их обнажихом без милости, коровку их и лошадку отъемше, самех же с женами и детми далече от своих предел, аки скверных, отгнахом; неких же и князньскых власти предавше, истреблению конечному подложихом. И иже повелены есмы и своа нищим роздати, даже съвръшении в добродетели будем, мы же, акы своа душа возненавидяще и аки противу заповедей господьских ополчающеся, обидим и грабим, продаваем христиааний, наших братий, и бичем их истязуем без милости, аки звери дивии на телеса их скакающе. <…>