Тропарь Николаю II, Императору Российскому

Царства земного лишение, узы и страдания многоразличныя, кротко претерпел еси, свидетельствовав о Христе даже до смерти от богоборцев, страстотерпче великий Боговенчанный Царю Николае, сего ради мученическим венцем на небесех, венчя тя с Царицею и чады и слуги твоими Христос Бог, Его же моли помиловати страну Российскую и спасти души наша.

Тропарь Царственным мученикам

Ангели земли Российския, и воскресения ея путеводителие, Царю Николае и Царица Александро, начавшемуся богоотступлению, Державою благоверно правивши, и юныя Великия Княжны, в трудех и милосердии добре подвизавшияся, и царевичу-страдальче Алексие, Царственнии страстотерпцы, яко агнцы незлобивии, от безбожных губителей Руси мучимии и заклании, ныне же царство вечное приимшии, молитися Небесному Царю Царей о Державе сродников ваших, просветитися ей верою отцев и покаянием паки возродитися.

Кондак Царственным мученикам

Днесь ублажаем Царственныя страстотерпцы, первее богоугодне России послужившия, труды и скорби велия понесшия, от богоборцев за благочестие возненавиденныя, и сего ради яко Православия столпи, слугами диавола убиенныя. Молим вы, святии мученицы: Николае, Александро, Алексие, Ольго, Татиано, Марие, Анастасие, молите Христа Бога благочестием просветити люди ваша.

Молитва святому Царю-мученику Николаю

О, святый страстотерпче Царю мучениче Николае, помазанника Своего тя Господь избра, во еже милостивно и право судити людям твоим и хранителем Царства православного бытии. Царское служение сие и о душах попечение со страхом Божиим совершал еси. Испытуя же тя, яко злато в горниле, скорби горькия Господь ти попусти, яко же Иову Многострадальному, последи же престола царскаго лишение и мученическую смерть посла ти. Вся сия кротко претерпевый, яко истинный раб Христов, наслаждаешися ныне вышния славы у Престола всех Царя, купно со святыми мученики: святою царицею Александрою, святым отроком царевичем Алексием, святыми царевнами: Ольгою, Татианою, Мариею, Анастасиею и с верными слуги твоими, таже со святою мученицею княгинею Елисаветою и со всеми царственными мученики и святою мученицею Варварою. Но яко имея дерзновение велие у Христа Царя, Его же ради вси пострадаша, моли с ними, да отпустит Господь грех народа, не возбранившаго убиение твое, Царя и помазанника Божия, да избавит Господь страждущую страну Российскую от лютых безбожник, за грехи наша и отступление от Бога попущенных, и возставит Престол православных Царей, нам же подаст грехов прощение, и на всякую добродетель наставит нас, да стяжем смирение, кротость и любовь, яже сии мученицы явиша, да сподобимся Небесного Царствия, идеже купно с тобою и всеми святыми новомученики и исповедники российскими прославим Отца и Сына и Святаго Духа, ныне и присно и во веки веков. Аминь.

В Русской Православной Церкви Царская семья прославлена в лике страстотерпцев. В День памяти этих святых в наших храмах читаются и поются такие молитвы:

Тропарь царственных страстотерпцев

Днесь, благовернии людие, светло почтим седмерицу честную царственных страстотерпец, Христову едину домашнюю Церковь: Николая и Александру, алексия, Ольгу, Татиану, Марию и Анастасию, Тии бо, уз и страданий многоразличных не убоявшеся, от богоборных смерть и поругание телес прияша и дерзновение ко Господу в молитве улучиша. Сего ради к ним с любовию возопиим: о святии страстотерпцы, гласу покаяния и стенания народа нашего вонмите, землю Российскую в любви к Православию утвердите, от междуусобныя брани сохраните, мир мирови у Бога испросити и душам нашим велию милость.