Псалом избранный

Госпо́дь воцари́ся, в ле́поту облече́ся. / Облече́ся Госпо́дь в си́лу и препоя́сася. / И́бо утверди́ вселе́нную, я́же не подви́жится. / Кто возглаго́лет си́лы Госпо́дни, слы́шаны сотвори́т вся хвалы́ Его́? / Да испове́дятся Го́сподеви ми́лости Его́, и чудеса Его́ сыново́м челове́ческим. / И изве́л еси́ ны от тмы и се́ни сме́ртныя. / Я́ко сокруши́ врата́ ме́дная, и вереи́ желе́зныя сломи́. / И изба́ви я́ от растле́ний их, и у́зы их растерза́. / Я́ко услы́ша убо́гия Госпо́дь. / И окова́нныя Своя́ не уничижи́. / Воста́ я́ко спя Госпо́дь, и порази́ враги́ Своя́. / Я́ко о́чи Госпо́дни на упова́ющия на ми́лость Его́. / Услы́шати воздыха́ние окова́нных. / Разреши́ти сы́ны умерщвле́нных. / Да воскре́снет Бог, и расточа́тся врази́ Его́, и да бежа́т от лица́ Его́. / Сей день, его́же сотвори́ Госпо́дь, возра́дуемся и возвесели́мся в онь. / Воскресени́, Го́споди Бо́же мой, да вознесе́тся рука́ Твоя́, не забу́ди убо́гих Твои́х до конца́. / Го́споди Бо́же мой, в век испове́мся Тебе́.

Таже полиелей. И седален, глас 1.
Подобен: Гроб Твой Спа́се:

Ви́дя Моя́ ре́бра, и я́звы гвозде́й, Фомо́, / что не ве́руеши Моему́ Воскресе́нию? / Госпо́дь глаго́лаше, воскре́с от гро́ба, / явля́яся апо́столом неизрече́нно. / Близне́ц же ве́ровав, вопия́ше Созда́телю: / Бог мой еси́ и Госпо́дь.

Сла́ва, и ны́не: тойже. И чтение праздника:

Посем степенна, 1-й антифон 4-го гласа. Прокимен, глас 4: Похвали́ Иерусали́ме Го́спода, / хвали́ Бо́га твоего́ Сио́не. Стих: Я́ко укрепи́ вереи́ врат твои́х.

Вся́кое дыха́ние:

Евангелие от Матфеа, зачало 116, утреннее воскресно, 1. [Мф. 28, 16 – 20.]

Во вре́мя о́но, единиина́десять ученицы́ идо́ша в Галиле́ю, в го́ру, а́може повеле́ им Иису́с: И ви́девше Его́, поклони́шася Ему́: о́ви же усумне́шася. И присту́пль Иису́с, рече́ им, глаго́ля: даде́ся Ми вся́ка власть на небеси́ и на земли́: Ше́дше научи́те вся язы́ки, крестя́ще их во и́мя Отца́, и Сы́на, и Свята́го Ду́ха, уча́ще их блюсти́ вся, ели́ка запове́дах вам. И се, Аз с ва́ми есмь во вся дни, до сконча́ния ве́ка. Ами́нь.

Таже: Воскресе́ние Христо́во ви́девше: трижды: псалом 50. И целование Евангелиа. Таже, Сла́ва: Моли́твами апо́стол, Ми́лостиве: И ны́не: Моли́твами Богоро́дицы: Посем стихира: Воскре́с Иису́с от гро́ба, / я́коже прорече́ / даде́ нам живо́т ве́чный, / и ве́лию ми́лость. Таже, Спаси́ Бо́же лю́ди Твоя́:

И абие канон праздника, творение Иоанна монаха. Глас 1. Ирмос по дважды, тропари же на 12. От днесь начинаем глаголати: Пои́м Го́сподеви: во всю Пятдесятницу.