Канон 8-го гласа
Песнь 1
Ирмос: Во́ду проше́д, я́ко сушу, и еги́петскаго зла избежав, израильтянин вопияше: Избавителю и Бо́гу на́шему поим.
Припев: Ди́вен Бог во святы́х Свои́х, Бог Изра́илев.
Сме́ртию смерть Христо́ву, и страстьми́ страсть подража́вше честну́ю му́ченицы вси, Боже́ственныя и блаже́нныя жи́зни получи́ша.
Припев: Упоко́й, Го́споди, ду́ши усо́пших раб Твои́х.
Ю́ности прегреше́ния презря́, и грехи́ превосходя́ Христе́ Спа́се, пре́жде усо́пшыя рабы́ Твоя́ со избра́нными Твои́ми сопричти́.
Сла́ва Отцу́ и Сы́ну и Свято́му Ду́ху
Ю́же получи́ша сла́ву же и ра́дость, я́же блаже́нное стяжа́вше пребыва́ние, пода́ждь бога́тно Твои́м рабо́м, я́же прия́л еси́, Многоми́лостиве.
И ны́не и при́сно и во ве́ки веко́в. Ами́нь.
Зачала́ еси́ Сло́во О́тчее, пло́ти соедини́вшееся по ипоста́си, е́же из Те́бе, Всенепоро́чная Отрокови́це, ад Боже́ственною си́лою упраздни́вшее.
|
|
Песнь 3
Ирмос: Небе́снаго кру́га Верхотво́рче, Го́споди, и Це́ркве Зижди́телю, Ты мене утверди́ в любви́ Твое́й, жела́ний кра́ю, ве́рных утвержде́ние, Еди́не Человеколю́бче.
Припев: Ди́вен Бог во святы́х Свои́х, Бог Изра́илев.
Очи́стившеся дре́вняго прароди́тельнаго паде́ния, креще́нием и па́ки порожде́нием, струя́ми же кровей свои́х окропи́вшеся, Христу́, блаже́ннии, сца́рствуете.
Припев: Упоко́й, Го́споди, ду́ши усо́пших раб Твои́х.
И́же ме́ртв волею поло́жься во гро́бе, и живу́щия во гробе́х взыва́яй Спа́се, благоволи́, я́же от нас прия́л еси́, в селе́ниих пра́ведных Твои́х сим водворя́тися.
Сла́ва Отцу́ и Сы́ну и Свято́му Ду́ху
Благоутро́бием Боже́ственныя Твоея́ Влады́ко, и соесте́ственне разумеваемыя бла́гости, умоле́н быва́я, грехо́в разреше́ние пода́в рабо́м Твои́м, Спа́се, упоко́й.
И ны́не и при́сно и во ве́ки веко́в. Ами́нь.
Вопло́щься из чрева Твоего́, и быв человек, иже изрядне сый Един Человеколюбец, спасает человека от врат смертных, Богомати Пречистая, едина всепе́тая.
Го́споди, поми́луй ( трижды).
Седален, глас 6-й
Вои́стинну суета́ вся́ческая, житие́ же сень и со́ние, ибо всу́е мяте́тся всяк земноро́дный, я́коже рече́ Писание: егда́ мир приобря́щем, тогда́ во гроб всели́мся, иде́же вку́пе ца́рие и ни́щии. Те́мже, Христе́ Бо́же, преста́вльшияся упоко́й, я́ко Человеколю́бец.
|
|
Сла́ва Отцу́ и Сы́ну и Свято́му Ду́ху, и ны́не, и при́сно, и во ве́ки веко́в. Ами́нь.
Всесвята́я Богоро́дице, во вре́мя живота́ моего́ не оста́ви мене́, челове́ческому предста́тельству не вве́ри мя, но Сама́ заступи́ и поми́луй мя.
Песнь 4
Ирмос: Ты моя кре́пость, Го́споди, Ты моя и си́ла, Ты мой Бог, Ты мое́ ра́дование, не оста́вль не́дра О́тча, и на́шу нищету́ посети́в. Тем с проро́ком Авваку́мом зову́ Ти: си́ле Твое́й сла́ва, Человеколю́бче.
Припев: Ди́вен Бог во святы́х Свои́х, Бог Изра́илев.
Да Твоея́ Влады́ко сла́вы у́зрят, и све́тлость Твою́ светода́тельную на небесе́х полу́чат све́тло, всяк вид муче́ний носи́ти претерпе́ша му́ченицы Боже́ственнии, Тебе́ Христе́ пою́ще: си́ле Твоей сла́ва, Человеколю́бче.
Припев: Упоко́й, Го́споди, ду́ши усо́пших раб Твои́х.
Мно́ги оби́тели у Тебе́, Спасе, суть, по достоя́нию всем разделя́емы, по ме́ре доброде́телей; ты́я у́бо, Ще́дре, испо́лнити сих сподо́би, я́же ве́рою преста́вльшыяся, благоче́стно Те́бе вопию́щия: си́ле Твое́й сла́ва, Человеколю́бче.
Сла́ва Отцу́ и Сы́ну и Свято́му Ду́ху
Ра́вен нам Челове́к яви́лся еси́, Безсме́ртне, всем ра́вно смерть претерпе́л еси́, и жи́зни показа́л еси́ путь; ея́же преста́вльшыяся сподо́би я́ко Человеколю́бец, проще́ние согреше́ний я́ко Влады́ка подава́я, и све́та прича́стие даруй.
И ны́не и при́сно и во ве́ки веко́в. Ами́нь.
Ты ве́рных похвала́ еси́ Безневе́стная, Ты предста́тельница, Ты прибе́жище христиа́н: стена́ и приста́нище, к Сы́ну Твоему́ мольбы́ но́сиши Всенепоро́чная, и спаса́еши от бед, я́же ве́рою и любо́вию Богород́ицу чи́стую Тя ве́дущия.
Песнь 5
Ирмос: Вску́ю мя отри́нул еси́ от лица́ Твоего́, Све́те незаходи́мый, и покры́ла мя есть чу́ждая тьма окая́ннаго; но обрати́ мя, и к све́ту за́поведей Твои́х пути́ моя напра́ви, молю́ся.
Припев: Ди́вен Бог во святы́х Свои́х, Бог Изра́илев.
Несказа́нный Твоея́ сла́вы, и е́же па́че сло́ва Твоего́ блаже́нства, в селе́ниях святы́х, иде́же глас красен пра́зднующих, преста́вленныя к безстра́стней жи́зни, уще́дрив, сподо́би, Еди́не Человеколю́бче.
Припев: Упоко́й, Го́споди, ду́ши усо́пших раб Твои́х.
Иде́же чи́ни а́нгельстии, иде́же пра́ведных собо́ри ра́дуются, Авраа́ма в не́дрех всели́, Спа́се, рабы́ Твоя́, и со дерзнове́нием стра́шному и Боже́ственному престо́лу предста́ти благоволи́, Благоутро́бне.
Сла́ва Отцу́ и Сы́ну и Свято́му Ду́ху
Очище́ние нам яви́лся еси́, пра́вда же и избавле́ние, и я́звою Твое́ю на́ша не́мощи уврачева́л еси́. Ты у́бо, Ще́дре, я́ко благ, преста́вльшыяся в сла́дости райстей учини́.
И ны́не и при́сно и во ве́ки веко́в. Ами́нь.
Ми́лостивно, Ми́лостиве, челове́чества ме́ру восприя́л еси́, я́же Боже́ственныя сла́вы превы́шшими украшаяй возвыше́ньми, от деви́ческих ложе́сн плоть прие́м одушевле́ну, слове́сну, е́юже смерть погуби́л еси́.
Песнь 6
Ирмос: Очи́сти мя, Спа́се, мно́га бо беззако́ния моя́, и из глубины́ зол возведи́, молю́ся: к Те́бе бо возопи́х, и услы́ши мя, Бо́же спасе́ния моего́.
Припев: Ди́вен Бог во святы́х Свои́х, Бог Изра́илев.
Му́ченицы Твоя́, Спа́се, мно́гия му́ки претерпе́ша, любо́вию Твое́ю душа́ми уязви́вшеся святи́и, Твоей желающе присносущныя славы, и сладкаго Твоего́ причастия.
|
|
Припев: Упоко́й, Го́споди, ду́ши усо́пших раб Твои́х.
Чре́во врага́ сме́ртию растерза́л еси́, Спасе, и вся я́же в нем ю́зники воскреси́л еси́, живо́т дарова́вый; его́же преста́вленныя, Благоде́телю, сподо́би.
Сла́ва Отцу́ и Сы́ну и Свято́му Ду́ху
Слез и воздыха́ния су́щия во а́де рабы́ Твоя́ свободи́, Спа́се: я́ко Един бо благоутро́бен, отъя́л еси́ вся́ку сле́зу от вся́каго лица́, ве́рно благословя́щих Тя.
И ны́не и при́сно и во ве́ки веко́в. Ами́нь.
И́же естество́м Соде́тель, соде́тельствуется в ложесна́х Твои́х, по́лный я́ко Бог, истощава́ется, Всенепоро́чная; Еди́н безсме́ртный, за всех спасе́ние умира́ет сме́ртию.
Го́споди, поми́луй ( трижды).
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Кондак, глас 8-й
Со святы́ми упоко́й, Христе́, ду́ши раб Твои́х, иде́же несть боле́знь, ни печа́ль, ни воздыха́ние, но жизнь безконе́чная.
Икос
Сам Един еси́ Безсме́ртный, сотвори́вый и создавый челове́ка; земни́и у́бо от земли́ созда́хомся и в зе́млю ту́южде по́йдем, я́коже повеле́л еси́, Созда́вый мя и реки́й ми: я́ко земля́ еси́ и в зе́млю оты́деши, а́може вси челове́цы по́йдем, надгро́бное рыда́ние творя́ще песнь: аллилу́ия, аллилу́ия, аллилу́ия.
Песнь 7
Ирмос: О́троцы евре́йстии в пещи́ попра́ша пла́мень дерзнове́нно, и на ро́су огнь преложи́ша, вопию́ще: благослове́н еси́ Го́споди Бо́же во ве́ки.
Припев: Ди́вен Бог во святы́х Свои́х, Бог Изра́илев.
Все жела́ние му́чеников простре́ся ко Еди́ному Влады́це, любо́вию Тому́ соединя́емое, и пою́щее: благослове́н еси́ Го́споди Бо́же во ве́ки.
|
|
Припев: Упоко́й, Го́споди, ду́ши усо́пших раб Твои́х.
Подае́ши ве́рою преста́вльшимся све́тлость Боже́ственнаго Ца́рствия, нетле́ния оде́жду да́руяй вопию́щим: благослове́н еси́ Го́споди Бо́же во ве́ки.
Сла́ва Отцу́ и Сы́ну и Свято́му Ду́ху
Испо́лни ра́дости и весе́лия, я́же преста́вил еси́ рабы́ Твоя́, Ще́дре, сподо́бивый их взыва́ти Те́бе и пе́ти: благослове́н еси́ Го́споди Бо́же во ве́ки.
И ны́не и при́сно и во ве́ки веко́в. Ами́нь.
Разреша́я Е́вину кля́тву, в пренепоро́чную всели́лся еси́ Де́ву, благослове́ния исто́чник источа́я вопию́щим: благослове́н, Пречи́стая, плод Твоего́ чре́ва.
Песнь 8
Ирмос: Мусики́йским орга́ном согласую́щим, и лю́дем безчи́сленным покланя́ющимся об́разу в Деи́ре, три о́троцы не повину́вшеся, Го́спода воспева́ху, и славосло́вляху во вся ве́ки.
Припев: Ди́вен Бог во святы́х Свои́х, Бог Изра́илев.
Зе́мленыя по́двиги проше́дше, небе́сныя прия́ша венцы́ му́ченицы и́стиннии, вопию́ще Ти непреста́нно: Го́спода по́йте, и превозноси́те во вся ве́ки.
Припев: Упоко́й, Го́споди, ду́ши усо́пших раб Твои́х.
Соше́д в ров преиспо́днейший, я́же во гробе́х живу́щия воскреси́л еси́ живонача́льною дла́нию, и пода́л еси́ рабо́м Твои́м, ве́рою пре́жде усо́пшим, поко́й, Ще́дре.
Сла́ва Отцу́ и Сы́ну и Свято́му Ду́ху
Я́ко исто́чник жи́зни присносу́щныя, я́ко сла́дости сый пото́к, рабы́ Твоя́, благоче́стно к Те́бе преста́вленыя, сподо́би пе́ти, и славосло́вити Тя во вся ве́ки.
И ны́не и при́сно и во ве́ки веко́в. Ами́нь.
Мари́е Де́во Богоро́дице, я́же Бо́га Спа́са челове́ком ро́ждшая теле́сно, спасай ве́рою пою́щия Твое́ Рождество́, и превознося́щия во вся ве́ки.
Песнь 9
Ирмос: Устраши́ся всяк слух неизрече́нна Бо́жия снисхожде́ния, я́ко Вышний во́лею сни́де да́же и до пло́ти, от деви́ческаго чре́ва быв челове́к. Те́мже Пречи́стую Богоро́дицу ве́рнии велича́ем.
Припев: Ди́вен Бог во святы́х Свои́х, Бог Изра́илев.
Иму́ще, му́ченицы Христо́вы, непобеди́мую кре́пость и неодоле́емую, уничижи́сте мучи́телей безбо́жное веле́ние, и Ца́рствия небе́снаго я́ве сподо́бистеся, просвеща́еми Тро́ичными заря́ми, достохва́льнии.
Припев: Упоко́й, Го́споди, ду́ши усо́пших раб Твои́х.
Разруши́ся ад го́рький, разруши́вшу Ти его́, Человеколюбие, и воскреси́вшу я́же от ве́ка та́мо спя́щия; но и ны́не я́ко благ преше́дшия к Тебе́, Благоутро́бне, невече́рняго све́та Твоего́ сподо́би.
Сла́ва Отцу́ и Сы́ну и Свято́му Ду́ху
Весь еси́, Спасе, сла́дость; весь еси́ жела́ние, и любо́вь вои́стинну ненасы́тная; весь еси́ добро́та несказа́нная; преста́вльшияся у́бо к Те́бе, Твоей красоты́ наслажда́тися благоволи́, и Божестве́нныя добро́ты Твоея сподо́би.
И ны́не и при́сно и во ве́ки веко́в. Ами́нь.
Спаси́ мя, Ма́ти Бо́жия, ро́ждшая Христа́ Спа́са моего́, Бо́га и челове́ка, сугу́ба естество́м, не ипоста́сию; единоро́дна у́бо от Отца, из Те́бе же перворо́дна всея́ тва́ри; Его́же в сугу́бом естестве́ велича́ем.
Досто́йно есть яко вои́стинну блажи́ти Тя, Богоро́дицу, присноблаже́нную и пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем (поклон).