Ексапостиларий воскресный

На день текущий

Четверток, 21 (8) мая 2020 года от Рождества Христова

 

Ведомо буди! Перед началом всякого келейного (домашнего молитвенного чтения) правила и по окончании его кладётся седмипоклонный начал:

Бо́же, ми́лостив бу́ди мне гре́шному. (Поклон)

Бо́же, очи́сти мя гре́шнаго и поми́луй мя. (Поклон)

Созда́вый мя, Го́споди, поми́луй мя. (Поклон)

Без числа́ согреши́х, Го́споди, прости́ мя. (Поклон)

Влады́чице моя, Пресвята́я Богоро́дице, спаси́ мя гре́шнаго. (Поклон)

А́нгеле, храни́телю мой святы́й, от вся́кого зла сохрани́ мя. (Поклон)

Святы́е апостоли, святителю отче Николае со всеми святыми, моли́те Бо́га о мне. (Поклон)

И молитва сия:

Боже, очисти мя грешнаго, яко николиже благо сотворих пред Тобою (Земной поклон), но избави мя от лукаваго, и да будет во мне воля Твоя (Земной поклон), да неосуждено отверзу уста моя недостойная, и восхвалю имя Твое святое, Отца и Сына и Святаго Духа, ныне и присно и во веки веков, аминь (Земной поклон).

 

Ведомо буди! Хотя до Дня Святой Троицы земные поклоны за соборной молитвой (общественным богослужением) в храмах прекращаются. Однако, на келейное правило данный запрет не распространяется. Келейно (на домашней молитве) по-прежнему можно и должно класть земные поклоны во всякое время.

 

По сем, осенив себя Крестом, глаголи сице:

 

Во и́мя Отца́, и Сы́на, и Свята́го Ду́ха. Ами́нь. (†)

 

Моли́твами святы́х оте́ц на́ших, Го́споди Иису́се Христе́ Бо́же наш, поми́луй нас. Аминь. (†)

 

Сла́ва Тебе́, Бо́же наш, сла́ва Тебе́. (†)

 

Молитва Святому Духу не глаголем, но рцем тропарь Пасхи, глас 5, трижды:

Христо́с воскре́се из ме́ртвых, сме́ртию смерть попра́в и су́щим во гробе́х живо́т дарова́в. (†)

 

Трисвятое

Святы́й Бо́же, Святы́й Кре́пкий, Святы́й Безсме́ртный, поми́луй нас (Читается трижды, с крестным знамением и поясным (если позволяет здоровье — земным) поклоном на каждый раз).

 

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. (†)

 

Молитва Пресвятой Троице

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

 

Го́споди, поми́луй. (3 — здесь и далее указано число раз произнесения того или иного молитвословия).

 

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. (†)

 

Молитва Господня

(По Евангелию от Матфея, глава 6, стихиры 9–13)

О́тче наш, И́же еси́ на небесе́х! Да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго. (†)

 

Я́ко Твое́ есть Ца́рство и си́ла и сла́ва во веки. Аминь. (†)

 

Тропари дня

В неделю 5-ю по Пасхе,

О самаряныне

Глас 4

Све́тлую воскресе́ния про́поведь/ от Ангела уве́девша Госпо́дни учени́цы/ и пра́деднее осужде́ние отве́ргша,/ апо́столом хва́лящася глаго́лаху:/ испрове́ржеся смерть,/ воскре́се Христос Бог,\ да́руяй ми́рови ве́лию ми́лость.

 

В четверток

апостолам, глас 3

Апо́столи святи́и, моли́те Ми́лостиваго Бо́га, да прегреше́ний оставле́ние пода́ст душа́м на́шим.

 

святителю Николаю, глас 4:

Пра́вило ве́ры и о́браз кро́тости, воздержа́ния учи́теля яви́ тя ста́ду твоему́ Я́же веще́й И́стина. Сего́ ра́ди стяжа́л еси́ смире́нием высо́кая, нището́ю бога́тая, о́тче священнонача́льниче Нико́лае, моли́ Христа́ Бо́га, спасти́ся душа́м на́шим.

 

Апостолу и евангелисту Иоанну Богослову

Глас 2

Апо́столе, Христу́ Бо́гу возлю́бленне,/ ускори́ изба́вити люди безотве́тны,/ прие́млет тя припа́дающа/ Иже па́дша на пе́рси прие́мый./ его́же моли́, Богосло́ве,/ и належа́щий о́блак язы́ков разгна́ти,// прося́ нам ми́ра и ве́лия ми́лости (†).

 

Преподобному Арсению Великому

Глас 8

Слез твои́х тече́ньми пусты́ни безпло́дное возде́лал еси́,/ и и́же из глубины́ воздыха́ньми во сто трудо́в уплодоноси́л еси́,/ и был еси́ свети́льник вселе́нней, сия́я чудесы́, Арсе́ние о́тче наш,/ моли́ Христа́ Бо́га спасти́ся душа́м на́шим.

 

Преподобному Арсению Печерскому, Трудолюбивому

Глас 8

Слез твои́х тече́ньми пусты́ни безпло́дное возде́лал еси́,/ и и́же из глубины́ воздыха́ньми во сто трудо́в уплодоноси́л еси́,/ и был еси́ свети́льник вселе́нней, сия́я чудесы́, Арсе́ние о́тче наш,/ моли́ Христа́ Бо́га спасти́ся душа́м на́шим.

 

Всем святым от века Богу угодившим

Глас 2

Апо́столи, му́ченицы и проро́цы, святи́телие, преподо́бнии и пра́веднии, до́бре по́двиг соверши́вшии и ве́ру соблю́дшии, дерзнове́ние иму́ще ко Спа́су, о нас Того́, я́ко Бла́га, моли́те, спасти́ся, мо́лимся, душа́м на́шим.

 

Таже тропари

Глас 4

Бо́же оте́ц на́ших, творя́й при́сно с на́ми по Твое́й кро́тости, не отста́ви ми́лость Твою́ от нас, но моли́твами их в ми́ре упра́ви живо́т наш.

 

И́же во всем ми́ре му́ченик Твои́х, я́ко багряни́цею и ви́ссом, кровьми́ Це́рковь Твоя́ украси́вшися, те́ми вопие́т Ти, Христе́ Бо́же: лю́дем Твои́м щедро́ты Твоя́ низпосли́, мир жи́тельству Твоему́ да́руй, и душа́м на́шим ве́лию ми́лость.

 

Сла́ва Отцу́ и Сы́ну и Свято́му Ду́ху, глас 8:

 

Со святы́ми упоко́й, Христе́, ду́ши раб Твои́х, иде́же несть боле́знь, ни печа́ль, ни воздыха́ние, но жизнь безконе́чная.

 

И ны́не и при́сно и во ве́ки веко́в. Ами́нь. Богородичен, глас 3:

 

Слово Отчее, Христа Бога нашего, / от Тебе воплотившагося, познахом, Богородице Дево, / едина Чистая, / едина Благословенная. / Тем непрестанно Тя, воспевающе, величаем.

 

Го́споди, поми́луй (12).

 

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. (†)

 

Прииди́те, поклони́мся Царе́ви на́шему Бо́гу. (Поклон)

Прииди́те, поклони́мся и припаде́м Христу́, Царе́ви на́шему Бо́гу. (Поклон)

Прииди́те, поклони́мся и припаде́м Самому́ Христу́, Царе́ви и Бо́гу на́шему. (Поклон)

 

Таже глаголем избранные псалмы сии:

 

Псалом 3

Го́споди, что ся умно́жиша стужа́ющии ми? Мно́зи востаю́т на мя, мно́зи глаго́лют души́ моей: несть спасе́ния ему в Бо́зе его. Ты же, Го́споди, Засту́пник мой еси́, слава моя и вознося́й главу́ мою. Гла́сом мои́м ко Го́споду воззва́х, и услы́ша мя от горы́ святы́я Своея́. Аз усну́х, и спах, воста́х, я́ко Господь засту́пит мя. Не убою́ся от тем люде́й, о́крест напа́дающих на мя. Воскресни́, Го́споди, спаси́ мя, Бо́же мой, я́ко Ты порази́л еси́ вся вражду́ющыя ми всу́е: зубы гре́шников сокруши́л еси. Госпо́дне есть спасе́ние, и на лю́дех Твоих благослове́ние Твое.

 

Псалом 22

Госпо́дь пасе́т мя, и ничто́же мя лиши́т. На ме́сте зла́чне, та́мо всели́ мя, на воде́ поко́йне воспита́ мя. Ду́шу мою обрати́, наста́ви мя на стези́ пра́вды, и́мене ра́ди Своего́. Аще бо и пойду́ посреде́ се́ни сме́ртныя, не убою́ся зла, я́ко Ты со мно́ю еси́, жезл Твой и па́лица Твоя́, та мя уте́шиста. Угото́вал еси́ предо́ мно́ю трапе́зу сопроти́в стужа́ющым мне, ума́стил еси́ еле́ом главу́ мою, и ча́ша Твоя́ упоява́ющи мя, я́ко держа́вна. И ми́лость Твоя́ пожене́т мя вся дни живота́ моего́, и е́же всели́ти ми ся в дом Госпо́день, в долготу́ дний.

Псалом 26

Госпо́дь просвеще́ние мое́ и Спаси́тель мой, кого́ убою́ся? Госпо́дь Защи́титель живота́ моего́, от кого́ устрашу́ся? Внегда́ приближа́тися на мя зло́бующым, е́же сне́сти пло́ти моя́, оскорбля́юшии мя, и врази́ мои́, тии изнемо́гоша и падо́ша. Аще ополчи́тся на мя полк, не убои́тся се́рдце мое́, а́ще воста́нет на мя брань, на Него́ аз упова́ю. Еди́но проси́х от Го́спода, то взыщу́: е́же жи́ти ми в дому́ Госпо́дни вся дни живота́ моего́, зре́ти ми красоту́ Госпо́дню и посеща́ти храм святы́й Его. Яко скры мя в селе́нии Свое́м в день зол мои́х, покры́ мя в та́йне селе́ния Своего́, на ка́мень вознесе́ мя. И ны́не се вознесе́ главу́ мою, на враги́ моя́: обыдо́х и пожро́х в селе́нии Его же́ртву хвале́ния и воскликнове́ния, пою́ и воспою́ Го́сподеви. Услы́ши, Го́споди, глас мой, и́мже воззва́х: поми́луй мя и услы́ши мя. Тебе́ рече́ се́рдце мое́, Го́спода взыщу́. Взыска́ Тебе́ лице́ мое́, лица́ Твоего́, Го́споди, взыщу́. Не отврати́ лица́ Твоего́ от мене́ и не уклони́ся гне́вом от раба́ Твоего́: помо́щник мой бу́ди, не отри́ни мене́, и не оста́ви мене́, Бо́же Спаси́телю мой. Яко отец мой и ма́ти моя́ оста́виста мя, Госпо́дь же восприя́т мя. Законоположи́ ми, Го́споди, в пути́ Твое́м и наста́ви мя на стезю́ пра́вую враг мои́х ра́ди. Не преда́ждь мене́ в ду́шы стужа́ющих ми, я́ко воста́ша на мя свиде́теле непра́веднии и солга́ непра́вда себе́. Ве́рую ви́дети блага́я Госпо́дня на земли́ живы́х. Потерпи́ Го́спода, мужа́йся и да крепи́тся се́рдце твое́, и потерпи́ Го́спода.

Псалом 36

Не ревну́й лука́внующым, ниже́ зави́ди творя́щым беззако́ние. Зане́ яко трава́ ско́ро и́зсшут, и яко зе́лие зла́ка скоро отпаду́т. Упова́й на Господа, и твори́ благосты́ню, и насели́ зе́млю, и упасе́шися в бога́тстве ея́. Наслади́ся Го́сподеви, и даст ти проше́ния се́рдца твоего. Откры́й ко Господу путь твой, и упова́й на Него, и Той сотвори́т: и изведе́т яко свет пра́вду твою и судьбу́ твою яко полу́дне. Повини́ся Господеви и умоли́ Его. Не ревну́й спе́ющему в пути своем человеку, творя́щему законопреступле́ние. Преста́ни от гне́ва и оста́ви ярость: не ревну́й, е́же лука́вновати. Зане́ лука́внующии потребя́тся, терпя́щии же Господа, ти́и насле́дят землю. И еще ма́ло, и не будет грешника: и взы́щеши место его, и не обря́щеши. Кро́тцыи же насле́дят землю и насладя́тся о мно́жестве мира. Назира́ет грешный пра́веднаго и поскреже́щет нань зубы́ своими. Господь же посмее́тся ему, зане́ презира́ет, яко прии́дет день его. Мечь извлеко́ша гре́шницы, напряго́ша лук свой, низложи́ти убо́га и ни́ща, закла́ти пра́выя сердцем. Мечь их да вни́дет в сердца́ их, и лу́цы их да сокруша́тся. Лучше малое пра́веднику, паче бога́тства грешных мно́га. Зане́ мы́шцы грешных сокруша́тся, утвержда́ет же пра́ведныя Господь. Весть Господь пути непоро́чных, и достоя́ние их в век будет. Не постыдя́тся во время лю́тое, и во днех гла́да насы́тятся, яко гре́шницы поги́бнут. Врази́ же Господни, ку́пно просла́витися им и вознести́ся, исчеза́юще яко дым исчезо́ша. Зае́млет гре́шный и не возврати́т, пра́ведный же ще́дрит и дае́т. Яко благословя́щии Его насле́дят зе́млю, клену́щии же Его потребя́тся. От Господа стопы́ человеку исправля́ются, и пути его восхо́щет зело́. Егда паде́т, не разбие́тся, яко Господь подкрепля́ет ру́ку его. Юне́йший бых, ибо состаре́хся, и не ви́дех праведника оста́влена, ниже́ се́мени его прося́ща хле́бы. Весь день ми́лует и взаи́м дае́т пра́ведный, и се́мя его во благослове́ние будет. Уклони́ся от зла, и сотвори бла́го, и всели́ся в век века. Яко Господь любит суд и не оста́вит преподо́бных Своих, во век сохраня́тся. Беззако́нницы же изжену́тся, и семя нечести́вых потреби́тся. Пра́ведницы же насле́дят землю и вселя́тся в век ве́ка на ней. Уста́ пра́веднаго поуча́тся прему́дрости, и язык его возглаго́лет суд. Закон Бога его в сердце его, и не за́пнутся стопы́ его. Сматря́ет гре́шный пра́веднаго и и́щет е́же умертви́ти его. Господь же не оста́вит его в руку́ его, ниже́ осу́дит его, егда́ су́дит ему. Потерпи́ Господа, и сохрани́ путь Его, и вознесе́т тя, еже насле́дити землю, внегда́ потребля́тися гре́шником, у́зриши. Ви́дех нечести́ваго превознося́щася и вы́сящася, яко ке́дры Лива́нския. И ми́мо идо́х, и се не бе́, и взыска́х его, и не обре́теся место его. Храни незло́бие и ви́ждь правоту́, я́ко есть оста́нок человеку ми́рну. Беззако́нницы же потребя́тся вку́пе: оста́нцы же нечести́вых потребя́тся. Спасе́ние же пра́ведных от Господа, и Защи́титель их есть во вре́мя ско́рби. И помо́жет им Господь, и изба́вит их, и и́змет их от гре́шник, и спасе́т их, яко упова́ша на Него.

 

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

 

Аллилу́иа, аллилу́иа, аллилу́иа, сла́ва Тебе́, Бо́же! (3)

Го́споди, поми́луй. (3)

 

Седа́лен

Гла́с 4

Распны́йся на́с ра́ди во́лею, и вмене́н бы́в в ме́ртвых Животода́вче, и воскре́с тридне́вно Христе́ Бо́же на́ш, сокруши́л еси́ си́лою Твое́ю сме́рти держа́ву, все́х воста́нием Твои́м су́щих во а́де оживи́вый. И воспева́юще чте́м Твое́ воста́ние вси́, безсме́ртне Го́споди.

 

Сти́х: Во всю́ зе́млю изы́де веща́ние и́х, и в концы́ вселе́нныя глаго́лы и́х.

 

Свети́ла в конце́х ученики́ Твоя́, Спа́се, показа́л еси́ сия́юща Твои́м пропове́данием, просвеща́ющыя ду́шы на́шя: пре́лесть и́дольскую те́ми омрачи́в, уче́ньми благоче́стия просвети́вый ми́р. Те́х моли́твами спаси́ ду́шы на́шя.

 

Сти́х: Ди́вен Бо́г во святы́х Свои́х, Бо́г Изра́илев.

 

Му́ченичен: Кресто́м вооружи́вшеся страстоте́рпцы Твои́, победи́ша ко́зни злонача́льнаго врага́, Христе́ Бо́же на́ш: возсия́ша я́ко свети́ла, челове́ки наставля́юще, подаю́т исцеле́ния ве́рою прося́щым. Те́х моли́твами спаси́ ду́шы на́шя.

 

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богоро́дичен:

 

Ско́ро приими́, Влады́чице, моли́твы на́шя, и сия́ принеси́ Сы́ну Твоему́ и Бо́гу, Госпоже́ Всепречи́стая: разруши́ обстоя́ния, к Тебе́ притека́ющих: разсы́пли приседа́ния и де́рзости, Де́во, ны́не вооружа́ющихся на рабы́ Твоя́.

 

Псалом 39

Терпя́, потерпе́х Господа, и вня́т ми, и услы́ша молитву мою. И возведе́ мя от ро́ва страсте́й, и от бре́ния ти́ны, и поста́ви на ка́мени но́зе мои, и испра́ви стопы́ моя, и вложи́ во уста́ моя песнь но́ву, пе́ние Богу нашему. Узрят мно́зи и убоя́тся, и упова́ют на Господа. Блаже́н муж, ему́же есть имя Господне упова́ние его, и не призре́ в суеты́ и неистовле́ния ло́жная. Мно́га сотвори́л еси́ Ты, Господи, Боже мой, чудеса́ Твоя и помышле́нием Твоим несть кто́ уподо́бится Тебе: возвести́х и глаго́лах, умно́жишася па́че числа́. Же́ртвы и приноше́ния не восхоте́л еси́, те́ло же сверши́л ми еси, всесожже́ний и о гресе́ не взыска́л еси́. Тогда рех: се прииду́, в глави́зне кни́жне пи́сано есть о мне: е́же сотвори́ти во́лю Твою, Боже мой, восхоте́х, и зако́н Твой посреде́ чре́ва моего́. Благовести́х пра́вду в це́ркви вели́цей, се устна́м мои́м не возбраню́: Господи, Ты разуме́л еси́. Пра́вду Твою не скрых в се́рдце мое́м, и́стину Твою и спасе́ние Твое рех, не скрых ми́лость Твою и и́стину Твою от со́нма мно́га. Ты же, Господи, не удали́ щедро́т Твои́х от мене́: ми́лость Твоя и и́стина Твоя вы́ну да засту́пите мя. Яко одержа́ша мя зла́я, и́мже несть числа́, постиго́ша мя беззако́ния моя, и не возмого́х зре́ти, умно́жишася па́че влас главы́ моея́, и се́рдце мое́ оста́ви мя. Благоволи́, Господи, изба́вити мя: Господи, во е́же помощи́ ми вонми́. Да постыдя́тся и посра́мятся вку́пе и́щущии ду́шу мою изъя́ти ю́, да возвратя́тся вспять и постыдя́тся хотя́щии ми зла́я. Да прии́мут а́бие студ свой глаго́лющии ми: бла́гоже, бла́гоже. Да возра́дуются и возвеселя́тся о Тебе вси и́щущии Тебе, Господи, и да реку́т вы́ну: да возвели́чится Господь, лю́бящии спасе́ние Твое. Аз же нищ есмь и убог, Господь попече́тся о мне. Помо́щник мой и Защи́титель мой еси Ты, Боже мой, не закосни́.

 

Псалом 53

Боже, во имя Твое спаси́ мя и в силе Твоей суди́ ми. Боже, услы́ши молитву мою, внуши глаго́лы уст моих. Яко чу́ждии воста́ша на мя, и кре́пцыи взыска́ша ду́шу мою, и не предложи́ша Бога пред собо́ю. Се бо Бог помогает ми, и Господь Засту́пник души моей. Отврати́т злая врагом моим, и́стиною Твоею потреби́ их. Во́лею пожру́ Тебе, испове́мся и́мени Твоему, Господи, я́ко бла́го, яко от вся́кия печали изба́вил мя еси, и на враги моя воззре́ о́ко мое.

 

Псалом 58

Изми́ мя от враг моих, Боже, и от востаю́щих на мя изба́ви мя. Изба́ви мя от де́лающих беззако́ние и от муж крове́й спаси́ мя. Яко се улови́ша ду́шу мою, нападо́ша на мя кре́пцыи, ниже́ беззако́ние мое, ниже́ грех мой, Господи. Без беззако́ния теко́х и испра́вих, воста́ни в сре́тение мое и виждь. И Ты, Господи Боже сил, Боже Израилев, вонми́ посети́ти вся язы́ки, да не уще́дриши вся де́лающыя беззако́ние. Возвратя́тся на вечер и вза́лчут, я́ко пес, и обы́дут град. Се ти́и отвеща́ют усты́ своими, и мечь во устна́х их, я́ко кто слы́ша? И Ты, Господи, посмее́шися им, уничижи́ши вся язы́ки. Держа́ву мою к Тебе сохраню́, я́ко Ты, Боже, Засту́пник мой еси. Бог мой, милость Его предвари́т мя, Бог мой, яви́т мне на вразе́х моих. Не уби́й их, да не когда́ забу́дут зако́н Твой, расточи я́ силою Твое́ю, и низведи́ я́, Защи́тниче мой, Господи. Грех уст их, сло́во усте́н их, и я́ти да бу́дут в горды́ни своей, и от кля́твы и лжи возвестя́тся в кончи́не. Во гневе кончи́ны, и не бу́дут: и уве́дят, я́ко Бог влады́чествует Иа́ковом и концы́ земли́. Возвратя́тся на вечер, и вза́лчут, я́ко пес, и обы́дут град. Ти́и разы́дутся я́сти. Аще ли же не насы́тятся, и поро́пщут. Аз же воспою́ си́лу Твою и возра́дуюся зау́тра о ми́лости Твоей, я́ко был еси Засту́пник мой и Прибе́жище мое в день ско́рби моея́. Помо́щник мой еси, Тебе пою: я́ко Бог Заступник мой еси́, Боже мой, ми́лость моя.

 

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

 

Аллилу́иа, аллилу́иа, аллилу́иа, сла́ва Тебе́, Бо́же! (3)

Го́споди, поми́луй. (3)

 

Седа́лены

Гла́с 6

Я́ко ве́рней самаряны́не Го́споди, Божества́ Твоего́ исто́чник отве́рзл еси́, и излия́л еси́ богоразу́мие на ню́, напоя́я питие́м богоприя́тным: и ны́не все́м на́м низпосли́ прегреше́ний очище́ние преблаги́й.

 

Сти́х: Небеса́ пове́дают сла́ву Бо́жию, творе́ние же руку́ Его́ возвеща́ет тве́рдь.

 

Гла́с 4: Ве́ры пропове́дники ученики́ Твоя́, Спа́се, ми́рови показа́л еси́, наставля́я те́ми язы́ки к ра́зуму Твоему́: заря́ми бо сло́ва просвети́ша вся́, тьму́ неразу́мия прогна́вше ве́рою. Те́х моли́твами спаси́ ду́шы на́шя.

 

Сти́х: Ди́вен Бо́г во святы́х Свои́х, Бо́г Изра́илев.

 

Му́ченичен: Му́ченицы Твои́, Го́споди, во страда́ниих свои́х венцы́ прия́ша нетле́нныя от Тебе́ Бо́га на́шего: иму́ще бо кре́пость Твою́, мучи́телей низложи́ша, сокруши́ша и де́монов немощны́я де́рзости. Те́х моли́твами спаси́ ду́шы на́шя.

 

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богоро́дичен:

 

Услы́ши, Влады́чице, от боле́зненныя души́ вопию́щаго раба́ Твоего́, и мно́гих мои́х зо́л пода́ждь ми́ оставле́ние, Тебе́ бо и́мам предста́тельницу в де́нь и но́щь: изба́ви, Богоро́дице, от огня́ гее́нскаго, и поста́ви мя́ одесну́ю Сы́на Твоего́ и Бо́га.

 

Псалом 90

Живы́й в по́мощи Вы́шняго, в кро́ве Бо́га Небе́снаго водвори́тся. Рече́т Го́сподеви: Засту́пник мой еси́ и Прибе́жище мое́, Бог мой, и упова́ю на Него́. Яко Той изба́вит тя от се́ти ло́вчи, и от словесе́ мяте́жна, плещма́ Свои́ма осени́т тя, и под криле́ Его наде́ешися: ору́жием обы́дет тя и́стина Его. Не убои́шися от стра́ха нощна́го, от стрелы́ летя́щия во дни, от ве́щи во тме преходя́шия, от сря́ща, и бе́са полу́деннаго. Паде́т от страны́ твоея́ ты́сяща, и тма одесну́ю тебе́, к тебе́ же не прибли́жится, оба́че очи́ма твои́ма смо́триши, и воздая́ние гре́шников у́зриши. Яко Ты, Го́споди, упова́ние мое́, Вы́шняго положи́л еси́ прибе́жище твое́. Не прии́дет к тебе́ зло, и ра́на не прибли́жится телеси́ твоему́, я́ко Ангелом Свои́м запове́сть о тебе́, сохрани́ти тя во всех путе́х твои́х. На рука́х во́змут тя, да не когда́ преткне́ши о ка́мень но́гу твою́, на а́спида и васили́ска насту́пиши, и попере́ши льва и зми́я. Яко на Мя упова́, и изба́влю и́: покры́ю и́, я́ко позна́ и́мя Мое́. Воззове́т ко Мне, и услы́шу его: с ним есмь в ско́рби, изму́ его, и просла́влю его, долгото́ю дний испо́лню его, и явлю́ ему спасе́ние Мое́.

 

Псалом 101

Го́споди, услы́ши моли́тву мою́, и вопль мой к Тебе́ да прии́дет. Не отврати́ лица́ Твоего́ от мене́: во́ньже а́ще день скорблю́, приклони́ ко мне у́хо Твое́: во́ньже а́ще день призову́ Тя, ско́ро услы́ши мя. Яко исчезо́ша я́ко дым дни́е мои́, и ко́сти моя́ я́ко суши́ло сосхо́шася. Уя́звен бых я́ко трава́, и и́зсше се́рдце мое́, я́ко забы́х сне́сти хлеб мой. От гла́са воздыха́ния моего́ прильпе́ кость моя́ пло́ти мое́й. Уподо́бихся нея́сыти пусты́нней, бых я́ко нощны́й вран на ны́рищи. Бдех и бых я́ко пти́ца осо́бящаяся на зде. Весь день поноша́ху ми врази́ мои́, и хва́лящии мя мно́ю кленя́хуся. Зане́ пе́пел я́ко хлеб ядя́х, и питие́ мое́ с пла́чем растворя́х. От лица́ гне́ва Твоего́ и я́рости Твоея́: я́ко возне́с низве́ргл мя еси́. Дни́е мои́ я́ко сень уклони́шася, и аз я́ко се́но изсхо́х. Ты же, Го́споди, во век пребыва́еши, и па́мять Твоя́ в род и род. Ты воскре́с уще́дриши Сио́на, я́ко вре́мя уще́дрити его, я́ко прии́де вре́мя. Яко благоволи́ша раби́ Твои́ ка́мение его́, и персть его уще́дрят. И убоя́тся язы́цы и́мене Госпо́дня, и вси ца́рие зе́мстии сла́вы Твоея́. Яко сози́ждет Госпо́дь Сио́на, и яви́тся во сла́ве Свое́й. Призре́ на моли́тву смире́нных, и не уничижи́ моле́ния их. Да напи́шется сие́ в род ин, и лю́дие зи́ждемии восхва́лят Го́спода. Яко прини́че с высоты́ святы́я Своея́, Госпо́дь с Небесе́ на зе́млю призре́, услы́шати воздыха́ние окова́нных, разреши́ти сы́ны умерщвле́нных, возвести́ти в Сио́не И́мя Госпо́дне, и хвалу́ Его во Иерусали́ме. Внегда́ собра́тися лю́дем вку́пе, и царе́м, е́же рабо́тати Го́сподеви. Отвеща́ ему на пути́ кре́пости его: умале́ние дней мои́х возвести́ ми. Не возведи́ мене́ в преполове́ние дней мои́х: в ро́де родо́в ле́та Твоя́. В нача́лех Ты, Го́споди, зе́млю основа́л еси́, и дела́ руку́ Твое́ю суть небеса́. Та поги́бнут, Ты же пребыва́еши: и вся, я́ко ри́за обетша́ют, и я́ко оде́жду свие́ши я́ и изменя́тся. Ты же то́йжде еси́, и ле́та Твоя́ не оскуде́ют. Сы́нове раб Твои́х вселя́тся, и се́мя их во век испра́вится.

 

Псалом 142

Го́споди, услы́ши моли́тву мою́, внуши́ моле́ние мое́ во и́стине Твое́й, услы́ши мя в пра́вде Твое́й и не вни́ди в суд с рабо́м Твои́м, я́ко не оправди́тся пред Тобо́ю всяк живы́й. Яко погна́ враг ду́шу мою, смири́л есть в зе́млю живо́т мой, посади́л мя есть в те́мных, я́ко ме́ртвыя ве́ка. И уны́ во мне дух мой, во мне смяте́ся се́рдце мое́. Помяну́х дни дре́вния, поучи́хся во всех де́лех Твои́х, в творе́ниих руку́ Твое́ю поуча́хся. Возде́х к Тебе́ ру́це мои́, душа́ моя́, я́ко земля́ безво́дная Тебе́. Ско́ро услы́ши мя, Го́споди, исчезе́ дух мой, не отврати́ лица́ Твоего́ от мене́, и уподо́блюся низходя́щым в ров. Слы́шану сотвори́ мне зау́тра ми́лость Твою, я́ко на Тя упова́х. Скажи́ мне, Го́споди, путь во́ньже пойду́, я́ко к Тебе́ взях ду́шу мою́. Изми́ мя от враг мои́х, Го́споди, к Тебе́ прибего́х. Научи́ мя твори́ти во́лю Твою́, я́ко Ты еси́ Бог мой. Дух Твой Благи́й наста́вит мя на зе́млю пра́ву. И́мене Твоего́ ра́ди, Го́споди, живи́ши мя, пра́вдою Твое́ю изведе́ши от пе́чали ду́шу мою́. И ми́лостию Твое́ю потреби́ши враги́ моя́ и погуби́ши вся стужа́ющыя души́ мое́й, я́ко аз раб Твой есмь.

 

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

 

Аллилу́иа, аллилу́иа, аллилу́иа, сла́ва Тебе́, Бо́же! (3)

Го́споди, поми́луй. (3)

 

Седа́лен

Гла́с 6

Я́ко ве́рней самаряны́не Го́споди, Божества́ Твоего́ исто́чник отве́рзл еси́, и излия́л еси́ богоразу́мие на ню́, напоя́я питие́м богоприя́тным: и ны́не все́м на́м низпосли́ прегреше́ний очище́ние преблаги́й.

 

Стих: Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́.

 

Лучы́ я́ко со́лнце пра́вды, ва́с Христо́с испусти́, просвети́ти всю́ зе́млю апо́столи сла́внии: Боже́ственными ва́шими моли́твами, озаря́ете Боже́ственным све́том невече́рним все́х, и просвеща́ете ве́рою соверша́ющих святу́ю ва́шу па́мять.

 

Стих: Поми́луй мя, Бо́же, поми́луй мя, я́ко на Тя упова́ душа́ моя́, и на сень крилу́ Твое́ю наде́юся, до́ндеже пре́йдет беззако́ние.

 

Ско́ро предвари́, о́тче Нико́лае, и спаси́ рабы́ твоя́ от находя́щих на́м бе́д и скорбе́й, и́маши бо к Созда́телю и Бо́гу дерзнове́ние. Прииди́ у́бо вско́ре ко ве́рою тя́ призыва́ющым, твое́ ны́не предста́тельство и покро́в да́руя.

 

Сла́ва Отцу́ и Сы́ну и Свято́му Ду́ху, и ныне и присно, и во веки веков. Аминь. Богоро́дичен:

 

Я́ко все́х еси́ творе́ний вы́шшая, воспева́ти Тя́ досто́йно недоумева́юще, Богоро́дице, ту́не, мо́лим Тя́, поми́луй на́с.

 

Таже глаголем единожды:

 

Воскресе́ние Христо́во ви́девше, поклони́мся Свято́му Го́споду Иису́су, еди́ному безгре́шному, Кресту́ Твоему́ покланя́емся, Христе́, и свято́е Воскресе́ние Твое́ пое́м и сла́вим. Ты бо еси́ Бог наш, ра́зве Тебе́ ино́го не зна́ем, и́мя Твое́ имену́ем. Прииди́те вси ве́рнии, поклони́мся Свято́му Христо́ву Воскресе́нию, се бо прии́де Кресто́м ра́дость всему́ ми́ру. Всегда́ благословя́ще Го́спода, пое́м Воскресе́ние Его́: распя́тие бо претерпе́в, сме́ртию смерть разруши́.

 

Го́споди, поми́луй (12).

 

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. (†)

 

Прииди́те, поклони́мся Царе́ви на́шему Бо́гу. (Поклон)

Прииди́те, поклони́мся и припаде́м Христу́, Царе́ви на́шему Бо́гу. (Поклон)

Прииди́те, поклони́мся и припаде́м Самому́ Христу́, Царе́ви и Бо́гу на́шему. (Поклон)

 

Псалом 50

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя. Яко беззако́ние мое́ аз зна́ю и грех мой предо мно́ю есть вы́ну. Тебе́ Еди́ному согреши́х, и лука́вое пред Тобо́ю сотвори́х, я́ко да оправди́шися во словесе́х Твои́х и победи́ши, внегда́ суди́ти Ти. Се бо в беззако́ниих зача́т есмь, и во гресе́х роди́ мя ма́ти моя́. Се бо и́стину возлюби́л еси́, безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся, омы́еши мя, и па́че сне́га убелю́ся. Слу́ху моему́ да́си ра́дость и весе́лие, возра́дуются ко́сти смире́нныя. Отврати́ лице́ Твое́ от грех мои́х, и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́, и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́, и Ду́хом Влады́чним утверди́ мя. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́, возра́дуется язы́к мой пра́вде Твоей. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Яко а́ще бы восхоте́л еси́ же́ртвы, дал бых у́бо, всесожже́ния не благоволи́ши. Же́ртва Бо́гу дух сокруше́н, се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. тогда́ благоволи́ши же́ртву пра́вды, возноше́ние и всесожега́емая: тогда́ возложа́т на олта́рь Твой тельцы́.

 

По сем глаголи исповедание веры, сиречь:

Символ Веры

1 Ве́рую во еди́наго Бо́га Отца́ Вседержи́теля, Творца́ не́бу и земли́, ви́димым же всем и неви́димым. (†)

2 И во еди́наго Го́спода Иису́са Христа́, Сы́на Бо́жия, Единоро́днаго, И́же от Отца́ рожде́ннаго пре́жде всех век. (†)

3 Све́та от Све́та, Бо́га и́стинна от Бо́га и́стинна, рожде́нна, несотворе́нна, единосу́щна Отцу́, И́мже вся бы́ша. (†)

4 Нас ра́ди челове́к и на́шего ра́ди спасе́ния сше́дшаго с небе́с и воплоти́вшагося от Ду́ха Свя́та и Мари́и Де́вы и вочелове́чшася. (†)

5 Распя́таго же за ны при Понти́йстем Пила́те, и страда́вша, и погребе́нна. (†)

6 И воскре́сшаго в тре́тий день по Писа́нием. (†)

7 И возше́дшаго на Небеса́, и седя́ща одесну́ю Отца́. (†)

8 И па́ки гряду́щаго со сла́вою суди́ти живы́м и ме́ртвым, Его́же Ца́рствию не бу́дет конца́. (†)

9 И в Ду́ха Свята́го, Го́спода, Животворя́щаго, И́же от Отца́ исходя́щаго, И́же со Отце́м и Сы́ном спокланя́ема и ссла́вима, глаго́лавшаго проро́ки. (†)

10 Во еди́ну Святу́ю, Собо́рную и Апо́стольскую Це́рковь. (†)

11 Испове́дую еди́но креще́ние во оставле́ние грехо́в. (†)

12 Ча́ю воскресе́ния ме́ртвых, и жи́зни бу́дущаго ве́ка. Ами́нь. (†)

 

Здесь читаем каноны их два: Канон Триоди: самаряныни; Творение Иосифово, глас 4 и кано́н Пресвяте́й Богоро́дице тойже глас (без ирмосов).

 

Канон Триоди

Песнь 1.

Ирмос: Порази́вый Еги́пта, / и фарао́на мучи́теля погрузи́вый в мо́ри, / лю́ди спасл еси́ из рабо́ты, Моисе́йски пою́щия / песнь побе́дную, я́ко просла́вися (2).

 

Запев: Сла́ва Тебе́, Бо́же наш, сла́ва Тебе́.

 

Погребе́нный воста́, Собо́ю воздви́же род челове́ческий, / да ра́дуется тварь вся, / и мы́сленнии днесь о́блацы да кропя́т пра́вду я́ве.

 

Запев: Сла́ва Тебе́, Бо́же наш, сла́ва Тебе́.

 

Крест во́льный пло́тию прии́м, / тридне́вен воскре́сл от ме́ртвых, / а́дова сокро́вища, Живонача́льниче Го́споди истощи́в, / и изве́д окова́нныя ду́ши.

 

Запев: Сла́ва Тебе́, Бо́же наш, сла́ва Тебе́.

 

Зра́ком блиста́ющася, мироно́сицы видевше А́нгела, стра́хом бежа́ша от гро́ба, / Христово же воста́ние уве́девше, / и возвести́ти тща́тся ученико́м.

 

Запев: Сла́ва Тебе́, Бо́же наш, сла́ва Тебе́.

 

Покрыва́яй вода́ми превы́спренняя, Го́споди, вода́ жи́зни сый, / самаряны́ни, прося́щей Твоея́ честны́я воды́, / по́дал еси́ разуме́вшей благоутро́бие Твое́.

 

Запев: Пресвята́я Тро́ице Бо́же на́ш, сла́ва Тебе́.

 

О Тро́ице, ве́рою Тя чи́стою сла́вящих, / О́тче, Сы́не и Ду́ше, / я́ко Творе́ц всех спаса́й, / и очище́ние да́руй нам грехо́в, я́ко Преблаги́й.

 

Запев: Пресвята́я Богоро́дице, спаси́ нас.

 

Ра́дуйся, престо́ле о́гненный. / Ра́дуйся, све́щниче всезлаты́й. / Ра́дуйся, Све́та о́блаче. / Ра́дуйся, пала́то Сло́ва, и у́мная трапе́зо, / хлеб жи́зни досто́йно Христа́ носи́вшая.

 

Ин канон

 

Запев: Пресвята́я Богоро́дице, спаси́ нас.

 

Вои́стинну и вресноту́ родила́ еси́ Бо́га и Го́спода, и Богоро́дица Еди́на вои́стинну и вресноту́ нарекла́ся еси́ Чи́стая. Те́мже Тя́ ве́рно воспева́ем, и по до́лгу сла́вим.

 

Запев: Пресвята́я Богоро́дице, спаси́ нас.

 

Звезда́ Я́же от Иа́кова, возсия́ из Тебе́, Пречи́стая, изчита́яй мно́жество зве́зд, я́ко Бо́г. Те́мже Того́ сия́ньми отими́ мои́х грехо́в тьму́.

 

Звпев: Сла́ва Отцу́ и Сы́ну и Свято́му Ду́ху:

 

Неве́стник слове́сен ве́м Тя́ я́ве Бо́жия воплоще́ния, Чи́стая и Всенепоро́чная: молю́ Тя изба́вити мя́ страсте́й плотски́х и скорбе́й, и искуше́ний, и обстоя́ний.

 

Звпев: И ны́не и при́сно и во ве́ки веко́в, ами́нь.

 

Я́ко Ле́ствица, Я́же к на́м прише́ствия Вседержи́телева, Е́юже Бо́г сни́де на зе́млю, от землены́х страсте́й плотски́х к Небеси́ вознеси́ мя́, и к Бо́гу приведи́.

 

Песнь 3.

Ирмос: Утверди́ся се́рдце мое́ в Го́споде, / даю́щем моли́тву моля́щемуся, / я́ко лук си́льных изнемо́же, / и немощству́ющии препоя́сашася си́лою (2).

 

Запев: Сла́ва Тебе́, Бо́же наш, сла́ва Тебе́.

 

Во́лею на Дре́во возне́слся еси́, Сло́ве, / и зря́щее распада́хуся ка́мение, / и тварь преклоня́шеся вся, / и ме́ртвии из гробо́в, я́коже от сна воста́ху.

 

Запев: Сла́ва Тебе́, Бо́же наш, сла́ва Тебе́.

 

С душе́ю Тя прише́дша ко а́ду, Сло́ве, / видевше вся ду́ши пра́ведных, / от ве́чных уз отреша́хуся, / песносло́вяще я́же па́че ума́ си́лу Твою́.

 

Запев: Сла́ва Тебе́, Бо́же наш, сла́ва Тебе́.

 

Что чудите́ся; что во гро́бе вы и́щете с миром, жены́, Влады́ку? / Воста́, и мир совоздви́же, / А́нгел блиста́яйся мироно́сицам веща́ше.

 

Запев: Сла́ва Тебе́, Бо́же наш, сла́ва Тебе́.

 

Жизнь сый, Го́споди, и исто́чник безсме́ртия, / сел еси́ при исто́чнице, Ще́дре, / и Твои́х прему́дрых вод испо́лнил еси́ самаряны́ню прося́щую и пою́щую Тя.

 

Запев: Пресвята́я Тро́ице Бо́же на́ш, сла́ва Тебе́.

 

Еди́н над все́ми в Тро́ице Бог пое́тся, / Оте́ц и Сын и Боже́ственный Дух, / Его́же стра́хом сла́вят небе́снии чи́нове, я́сно вопию́ще: / Свят, Свят, Свят еси́ Го́споди.

 

Запев: Пресвята́я Богоро́дице, спаси́ нас.

 

Несказа́нно заче́нши во утро́бе Твое́й всех Бо́га, Де́во Ма́ти, / па́че мы́сли и сло́ва родила́ еси́, / пребы́вши Де́ва я́ко пре́жде рождества́, Богоневе́сто.

 

Ин канон

 

Запев: Пресвята́я Богоро́дице, спаси́ нас.

 

Теку́щий исто́чник, скорбя́щих утеше́ние еси́: те́мже, Влады́чице, и мне́ моли́твенных Твои́х во́д исто́чник источи́, и угаси́ страсте́й пе́щь.

 

Запев: Пресвята́я Богоро́дице, спаси́ нас.

 

Уя́звена мя́ по́мыслы безме́стными исцели́, Чи́стая, Я́же естества́ на́шего исцели́вшая я́зву лю́тую, ро́ждши Зижди́теля и Го́спода.

 

Звпев: Сла́ва Отцу́ и Сы́ну и Свято́му Ду́ху:

 

В пучи́не мно́гих мои́х прегреше́ний, и страсте́й и искуше́ний обурева́ема, к ти́хому зело́ приста́нищу, Всенепоро́чная, устреми́ Твои́м заступле́нием.

 

Звпев: И ны́не и при́сно и во ве́ки веко́в, ами́нь.

 

И́же я́ко на руно́ дожде́м Боже́ственным, во утро́бу Твою́ соше́дшим, опламене́нное огне́м страсте́й мое́ се́рдце ороси́ Твои́ми мольба́ми.

 

Катава́сиа: Утверди́ся се́рдце мое́ в Го́споде, / даю́щем моли́тву моля́щемуся, / я́ко лук си́льных изнемо́же, / и немощству́ющии препоя́сашася си́лою.

 

Го́споди, поми́луй. (3).

 

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

 

Седален самаряныни

Глас 4

Да ра́дуется не́бо, да ликовству́ют земна́я, / я́ко Христо́с от Де́вы яви́вся, я́ко Челове́к, / изба́ви из истле́ния все челове́чество Свое́ю сме́ртию, / чудесы́ же возсия́вый жене́ самаряны́не воды́ прося́щей, / подае́т исто́чник исцеле́ний, я́ко еди́н безсме́ртен.

 

Звпев: Сла́ва Отцу́ и Сы́ну и Свято́му Ду́ху, глас тойже:

 

Прему́дрости пода́телю и Влады́ко, / пра́зднику зако́нному предста́л еси́, / во святи́лищи сед учи́л еси́, глаго́ляй си́це всем: / гряди́те, жа́ждущии, пи́йте во́ду, ю́же Аз ны́не подаю́, / е́юже жи́зни от Бо́га и пи́щи наслади́теся вси челове́цы.

 

И ны́не и при́сно и во ве́ки веко́в, ами́нь. Глас тойже:

 

Богородице: Предста́тельнице нера́тная, Богороди́тельнице, и моли́твеннице гото́вая притека́ющым к Тебе́, от бе́д мя́ изба́ви: да не пре́зриши мене́, все́х Засту́пнице.

 

Песнь 4.

Ирмос: Услы́шах, Бо́же, слух Твой, и убоя́хся, / разуме́х дела́ Твоя́ и ужасо́хся, Го́споди, / я́ко Твоего́ хвале́ния испо́лнь земля́ (2).

 

Запев: Сла́ва Тебе́, Бо́же наш, сла́ва Тебе́.

 

Небеса́ да веселя́тся, да пра́зднует тварь вся, / воста́ Госпо́дь и яви́ся всем прему́дрым апо́столом Свои́м.

 

Запев: Сла́ва Тебе́, Бо́же наш, сла́ва Тебе́.

 

Поже́рта бысть, сме́рте, твоя́ си́ла, Христу́ уме́ршу, / ме́ртвии я́ко от черто́гов, воста́нием Сего́ от гробо́в изыдо́ша.

 

Запев: Сла́ва Тебе́, Бо́же наш, сла́ва Тебе́.

 

Что рыда́ете, о жены́; что с мvры и́щете Безсме́ртнаго? / Воста́, я́коже рече́, мироно́сицам глаго́ла А́нгел.

 

Запев: Сла́ва Тебе́, Бо́же наш, сла́ва Тебе́.

 

Самаряны́ни, Го́споди, проси́вшей пода́л еси́ во́ду, ве́дение держа́вы Твоея́, / те́мже во ве́ки не вжа́ждет воспева́ющи Тя.

 

Запев: Пресвята́я Тро́ице Бо́же на́ш, сла́ва Тебе́.

 

О Тро́ице пресу́щная, / О́тче, и Сло́ве, и Боже́ственный Ду́ше, / единоси́льне, собезнача́льне! / Спаси́ нас всех, ве́рою воспева́ющих Тя.

 

Запев: Пресвята́я Богоро́дице, спаси́ нас.

 

Неопали́мую купину́ Тя законоположи́тель зря́ше дре́вле, / Дании́л же го́ру святу́ю смотря́ше, / еди́на Де́во Ма́ти Влады́чице.

 

Ин канон

 

Запев: Пресвята́я Богоро́дице, спаси́ нас.

 

От ми́р Сы́на Твоего́ теку́щих, благоуха́нием жи́зни все́х, ми́ро безстра́стия источи́ души́ мое́й, Чи́стая, и ве́сь ка́л стра́сти ея́ потреби́.

 

Запев: Пресвята́я Богоро́дице, спаси́ нас.

 

Оскверне́ннаго мя́ ка́лом греха́, моли́тв Твои́х окропи́ иссо́пом, и омы́й, и скве́рну страсте́й мои́х очи́сти, Влады́чице, и яви́ Христу́ жили́ще.

 

Звпев: Сла́ва Отцу́ и Сы́ну и Свято́му Ду́ху:

 

Напи́сану Тя́ кни́гу пе́рстом Боже́ственным, запеча́тану, Пречи́стая, молю́, пе́рсты Твои́х моли́тв напиши́ мне́ прегреше́ний оставле́ние, и напа́стей изба́ви.

 

Звпев: И ны́не и при́сно и во ве́ки веко́в, ами́нь.

 

И́же от коне́ц го́р святы́х все́х, хра́м Бо́гу бы́вши я́коже пре́жде проро́к рече́: Христу́ чи́ст покажи́ мя хра́м, Влады́чице, Твои́ми заступле́ньми.

 

Песнь 5.

Ирмос: Возсия́й ми, Го́споди, свет повеле́ний Твои́х, / я́ко к Тебе́ дух мой у́тренюет, и пое́т Тя, / Ты бо еси́ Бог наш, / и к Тебе́ прибега́ю, Царю́ ми́ра (2).

 

Запев: Сла́ва Тебе́, Бо́же наш, сла́ва Тебе́.

 

Гроб Твой святы́й дости́гши ура́ньше мироно́сицы, / блиста́ющася ви́деша ю́ношу и ужасо́шася, / Твоему́ научи́вшеся воста́нию, Христе́.

 

Запев: Сла́ва Тебе́, Бо́же наш, сла́ва Тебе́.

 

Смерть умертви́ся, ад плени́ся, / су́щии во у́зах свободи́шася Христо́вым Воскресе́нием, / возра́дуимся и рука́ми воспле́щим, пра́зднующе све́тло.

 

Запев: Сла́ва Тебе́, Бо́же наш, сла́ва Тебе́.

 

Апо́столи взыгра́йте и а́нгели лику́йте, / земноро́днии вси возра́дуйтеся: / Госпо́дь воскре́се, / тля испрове́ржеся, и печа́ль преста́, и ликовству́ет Ада́м.

 

Запев: Сла́ва Тебе́, Бо́же наш, сла́ва Тебе́.

 

Исто́чник сый, Го́споди, жи́зни, / во́ду оставле́ния и разуме́ния дарова́л еси́, / жене́, проси́вшей дре́вле, самаряны́не. / Те́мже воспева́ем неизрече́нныя щедро́ты Твоя́.

 

Запев: Пресвята́я Тро́ице Бо́же на́ш, сла́ва Тебе́.

 

Еди́ницу триипоста́сную, Тро́ицу единосу́щную, / Отца́, Сло́ва, и Ду́ха Свята́го, / неразде́льна Естество́м Бо́га еди́наго почита́ем, / Творца́ и Го́спода и Влады́ку всех.

 

Запев: Пресвята́я Богоро́дице, спаси́ нас.

 

Тя, дверь непроходи́мую, и село́ невозде́ланное, / и ковче́г, ма́нну нося́щий, и ру́чку, и све́щник, / и кади́льницу невеще́ственнаго у́гля имену́ем, Чи́стая.

 

Ин канон

 

Запев: Пресвята́я Богоро́дице, спаси́ нас.

 

Тя́ ро́су Аермо́нску, на Сио́н соше́дшую, ве́дый, Богороди́тельнице, молю́ угаси́ти пло́ти моея́ запале́ние.

 

Запев: Пресвята́я Богоро́дице, спаси́ нас.

 

Ра́й жи́зни су́щи, Богоро́дице, сме́рти грехо́вныя и страсте́й многообра́зных изба́ви мя́ вско́ре.

 

Звпев: Сла́ва Отцу́ и Сы́ну и Свято́му Ду́ху:

 

Алава́стр мы́сленный, Чи́стая, Ты́ еси́, Ми́ра излия́вшагося на зе́млю с Небесе́: мене́ ны́не благоуха́ния испо́лни.

 

Звпев: И ны́не и при́сно и во ве́ки веко́в, ами́нь.

 

Прекло́ншагося ко тле́нию обнови́ла еси́ челове́ка: изведи́ у́бо и мене́ ны́не, Богоневе́сто, из глубины́ прегреше́ний и страсте́й.

 

Песнь 6.

Ирмос: Пожру́ Ти со гла́сом хвале́ния Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию (2).

 

Запев: Сла́ва Тебе́, Бо́же наш, сла́ва Тебе́.

 

На Кресте́ Тя беззако́ннии пригвозди́ша, / и копие́м прободо́ша, Христе́, / и Ио́сиф благообра́зный Тя погребе́ в но́вом гро́бе, / из него́же со сла́вою воскре́с, / совоскреси́л еси́, Спа́се, всю тварь пою́щую держа́ву Твою́.

 

Запев: Сла́ва Тебе́, Бо́же наш, сла́ва Тебе́.

 

Вереи́ и врата́, Влады́ко, си́льно сокруши́л еси́ а́довы, / и воскре́сл еси́, я́ко Бог, и срет, ра́дуйтеся, рекл еси́ жена́м, / и сих рещи́ посла́л еси́ ученико́м: / воста́ Живо́т, и ви́ден бысть, просвеща́яй концы́.

 

Запев: Сла́ва Тебе́, Бо́же наш, сла́ва Тебе́.

 

Что пла́чете? Что но́сите, я́ко сме́ртному, жены́, мvра? / Воста́ Христо́с, / вопия́ше дре́вле блиста́яйся вельми́, явле́йся ю́ноша, / тщи плащани́цы оста́вив: / ше́дше возвести́те друго́м Его́ воста́ние.

 

Запев: Сла́ва Тебе́, Бо́же наш, сла́ва Тебе́.

 

Струя́ сый, Го́споди, жи́зни незави́стная, / и бе́здна ми́лости, Бла́же, / путеше́ствовав седи́ши близ кла́дязя кля́твеннаго, / и самаряны́ни вопия́л еси́: / даждь Ми во́ду пи́ти, я́ко да прии́меши оставле́ния во́ды.

 

Запев: Пресвята́я Тро́ице Бо́же на́ш, сла́ва Тебе́.

 

Пою́ Отца́ безнача́льна, и Сы́на сопресто́льна, и Ду́ха единосу́щна ве́рно, / еди́но Существо́, и Естество́, и сла́ву, / и еди́но Ца́рство Бо́га всех и Творца́, / Содержи́теля всего́, со безпло́тными си́лами.

 

Запев: Пресвята́я Богоро́дице, спаси́ нас.

 

Де́ву, еди́ну ро́ждшую, и утро́бу нетле́нну соблю́дшу пое́м Тя, Чи́стая, / престо́л Госпо́день, и дверь, и го́ру, и мы́сленный све́щник, / черто́г всесве́тлый Бо́жий, и сень сла́вы я́ве, / ковче́г же и ру́чку, и трапе́зу.

 

Ин канон

 

Запев: Пресвята́я Богоро́дице, спаси́ нас.

 

Пала́та прекра́сна, сла́вная Влады́чице, Царя́ Сла́вы бы́вши, просла́вила еси́ челове́ки: те́мже сла́вы нетле́нныя и мене́ сподо́би.

 

Запев: Пресвята́я Богоро́дице, спаси́ нас.

 

Ути́шила еси́ тлю́ поро́чную естества́ чи́стым нетле́нием, но изсуши́, Пречи́стая, страсте́й мои́х пото́ки, и плотски́я му́дрости ре́ки.

 

Звпев: Сла́ва Отцу́ и Сы́ну и Свято́му Ду́ху:

 

Успи́ страстна́я движе́ния телесе́, и взыгра́ния моя́ плотска́я уму́ повини́ я́ко жребя́, успи́вши, Чи́стая, сно́м Твои́х моли́тв.

 

Звпев: И ны́не и при́сно и во ве́ки веко́в, ами́нь.

 

Пою́ Тя, Бо́га Препе́таго ро́ждшую, и молю́ Тя, Отрокови́це: стра́шныя мя́ при́ и ве́чнаго, Богоро́дице, осужде́ния изба́ви и спаси́ мя.

 

Катава́сиа: Да не погрузи́т мене́ бу́ря водна́я, / ниже́ пожре́т мене́ глубина́, / отве́ржен бо есмь во