А. Судебная реформа

Начало реформ по Продолжению Хронографа 1512 г.

<…>Т[ого] же месяца февраля, в 27 день[66], царь и ве[ли]кий князь Иван Васильевич всея Р[уси] в своих царьских полатах перед отцем своим Макарьем митрополитом и предо всем освященным собором говорил бояром своим князю Дмитрею Феодоровичю Бельскому, князю Юрью Михайло­вичу Булгакову, князю Фео[дору] Андреевичу Булгакову, князю [Пе]тру Михайловичю Щеняте[ву], князю Дмитрею Феодоровичю [Палец]кому, Василию Дмитреевичю [Ше]ину, князю Данилу Дмитрее[вичю] Пронскому, князю Алексан­дру Бо[ри]совичю Горбатому и иным своим бояром, и околничим, и двор[ецким] и казначеем, что до его царьского возраста от них и от их людей [д]етем боярским и христьяном [ч]инилися силы и продажи и обиды великие в землях, и в холопех и в ыных во многих делех, и они бы вперед так не чинили, детем бы боярьским и христьяном от них и от их людей силы и продажи и обиды во всяких делех не было никоторые, а хто вперед кому учинит силу или продажу и обиду, и тем от ца[ря] и великого князя быти в опале и в ка[зни]. И бояре все били челом государю [цар]ю и великому князю, чтобы государь [их] в том пожаловал, сердца на них [не дер]ьжал[67] и опалы им не учинил [ни]которые, а они хотят служити [ему], государю царю и великому князю, и до[бра х]отети ему и его людем во всем вправду, безо всякия хитрости п[о то]му же, как служили и добра хотели [го]спо­дарю своему, отцу его, велик[ому князю] Василию Ивановичю всея Руси…, и деду его, великому князю Ивану Ва­си[ль]евичю всея Руси. А которые будут дети боярьские и христьяне на них и на их людей учнут бити челом о каких делех ни буди, государь бы их пожаловал, давал им и их людем с теми детми боярьскими и со христьяны суд. И царь и великий князь Иван Васильевичь всея Руси пе[ред] отцом свои[м] Макарьем митрополитом и пе[ред] всем освященным со­бором бо[яр] своих всех пожаловал с ве[ликим] благочестием и усердием, нака[зав] их, умилне говорил им: «по [се вре]мя сердца на вас в тех делех н[е дер]жу и опалы на вас ни на кого [не поло]жу, а вы бе вперед так не чинили». [Да] и вое­водам и княжатам и боярь[ски]м детем и дворяном болшим [т]о же говорил; и пожаловал их, наказал всех с благоче­стием умилне. Того же месяца февраля, в 29 день, царь и великий князь Иван со отцем своим Макарьем митрополитом и з бояры уложил, что во всех городех Московьские земли наместником детей боярьских не судити [н]и в чем, опричь душегубства и тать[бы] и розбоя с поличным; да и грамо[ты с]вои жаловальные о том во все городы детем боярьским послал.<…>

Шмидт С.О. Продолжение Хронографа редакции 1512 года // Исторический архив. –

М.: Изд-во АН СССР, 1951. – Т.VII. – С.295-296