Песнь 6

Ирмос: Божественное сие и всечестное совершающе празднество, Богомудрии, Богоматере, приидите, руками восплещим, от Нея рождшагося Бога славим.

О, Великаго Царя Небеснаго Дщи!/ Виждь и мир сей посети,/ оскуде бо в нем христианское благочестие,/ к чистоте стремление и истинное любочестие./ Да не омрачимся духом сим,/ но да возгоримся жаждой заповедей исполнением/ и Христу Богу угождением,/ Ты бо еси мира хладнаго теплая Заступница.

Мати Божия Владычице,/ разори совет нечестивых, восстающих на ны/ да не попраны будут Евангельские Истины в мире сем,/ но да соделается оный, Престолом Божиим,/ и да святится Имя Его в сердцах наших,/ веры твердой утверждением,/ Христовою Любовию уязвлением,/ Ты бо еси мира хладнаго теплая Заступница.

Слава: Воззри, Пречистая Дево, на нас,/ с любовию к иконе Твоей припадающих,/ разрешения грехов и исправления жития у Тебя просящих./ Воспали в нас веру чисту, праву и непоколебиму,/ да последуем Христу Милостивому./ Сокруши силу зла на земли/ и пролей луч разума Христова в наши умы,/ Ты бо еси мира хладнаго теплая Заступница.

И ныне: Милости Твоя, Богородице, источи к роду человеческому,/ разруши, Дево, восстание хулящих крестную силу,/ даждь нам крепость, помощь и победу./ Избави нас злаго уныния и страстей омрачения,/ да избавимся коварных сетей лукаваго/ и да не лишимся Благодати Божественнаго./ Ты бо еси мира хладнаго теплая Заступница.

Кондак, глас 4

Светлое днесь Госпожи нашея наста торжество:/ созывает бо Пречистая боголюбивии собори в обитель Миасинскую,/ прославити икону Свою чудную,/ во езере сокрытую и, по мнозех временех, паки нам явившую./ Темже убо и мы, с любовию сию объемлюще, вопием:/ в Православии нерушимом сподоби ны благоугождати Сыну Твоему,/ и спаси нас, Владычице, во времена последняя.