Песнь 8

Ирмос: Отроки благочестивыя в пещи Рождество Богородичо спасло есть; тогда убо образуемое, ныне же действуемое, вселенную всю воздвизает пети Тебе: Господа пойте, дела, и превозносите Его во вся веки.

От древле до ныне имуще Тя, Пречистая,/ в напастех тверду Молитвенницу/ и в печалех скорую Утешительницу,/ к Тебе прибегаем и мольбы наша ныне возносим:/ простри руку спасения унывающим,/ отри слезы плачущим,/ поддержи слабых и болящих,/ подыми духом падающих/ и неотступна буди с нами во вся дни жизни нашея.

Мати Божия милосердая,/ отверзи нам, грешным, двери милосердия,/ озари нас светом Божественныя благодати Твоея,/ Иисуса Спаса Рождшая./ Умножи веру,/ укрепи надежду,/ умягчи жестосердие душ наших,/ исцели болезненное блуждание умов наших,/ и неотступна буди с нами во вся дни жизни нашея.

Слава: Троичен: Всех Царице и Владычице,/ подвигни ангелы и Архангелы,/ Апостоли, Мученицы и Пророцы,/ иже вкупе с Тобою предстоят Престолу Живоначальныя Троицы,/ согласно умолити за ны, непотребныя рабы Твоя/ да сподобимся присно славити и благословити Отца и Сына и Святаго Духа.

И ныне: Сниди к нам Твоим состраданием, о Небесная Вратарнице,/ и возведи нас, грешных,/ по лествице спасения, Чистая Отроковице./ В Тебе бо побеждаются естества уставы/ и во Твоей бо утробе Христос Бог наш вместитися благоволи./ Сего ради величаем Тя:/ Честнейшую Херувим и славнейшую без сравнения Серафим.