Ирмос: Не послужиша твари Богомудрии паче Создавшаго, но, огненное прещение мужески поправше, радовахуся, поюще: препетый отцев Господь и Бог, благословен еси.
Освящение душам и телесем Владычице нам подаеши / и всяк недуг, Предстательством Твоим, дивно исцеляеши./ Темже славим чудеса Твоя неизчислимая и любовию чтим лик Твой, о, Мати Милующая,/ присно нас любовию Своею снабдевающая, поющих Ти:/ радуйся, Источниче дарований, Богоблагодатная Дево.
Тобою, Пречистая, разслабленнии возстают,/ недугующии исцеляются,/ от бесов томимии свобождаются,/ и зрением святаго Образа Твоего,/ зноем страстей палимые души,/ благодатными струями чуднаго источника Твоея услаждаются./ Сего ради вопием Ти:/ радуйся, Источниче дарований, Богоблагодатная Дево.
Слава: Икона Твоя всечестная, Богородице Марие,/ помощь в бедах от Тебе верным подает/ и воды целебныя источает./ Всех бо милуеши и ущедряеши,/ и предстательством Твоим к Сыну Твоему приводиши./ Темже уврачуй болезни душ и телес наших,/ Тебе усердно вопиющих:/ радуйся, Источниче дарований, Богоблагодатная Дево.
И ныне: Никтоже, притекаяй к Тебе молитвенно,/ тощ и безутешен от Тебе исходит о, Мати рода Христианскаго!/ Тобою от одра болезненнаго недугующие воздвигаются/ и люте страждущие исцеляются./ Темже, благоговейно Образ Твой честный целующе, вопием Ти:/ радуйся, Источниче дарований, Богоблагодатная Дево.