2017-11-30
204
Молитва 1-я
Святый и великий Архангеле Божий Михаиле, неисповедимыя и пресущественныя Троицы, первый во Ангелех предстоятелю, рода же человеческаго приставниче и хранителю, сокрушивый со воинствы своими главу прегордаго денницы на небеси и всегда посрамляяй злобу и коварства eго на земли!
К тебе с верою прибегаем и тебе с любовию молимся: буди щит несокрушим и забрало твердо Святей Церкви и православному oтечествию нашему, oграждая их молниеносным мечем твоим oт всех враг видимых и невидимых. Буди наставник премудр и споспешник всем православным христианом, износя им oт Престола Царя царствующих просвещение и силу, радость, мир и утешение. Буди вождь и соратай непобедим Христолюбивому воинству нашему, венчая eго славою и победами над супостаты, да познают вси противляющиися нам, яко с нами Бог и святии Ангели Его!
Не oстави, o Архангеле Божий, помощию и заступлением твоим и нас, прославляющих днесь святое имя твое; се бо, аще многогрешнии eсмы, oбаче не хощем в беззакониих наших погибнути, но eже oбратитися ко Господу и oживленным быти oт Него на дела благая. Oзари убо ум наш светом Божиим, да возможем разумети, что eсть воля Божия o нас благая и совершенная, и ведети вся, яже подобает нам творити и яже презирати и oставляти. Укрепи благодатию Господнею слабую волю и немощное произволение наше, да утвердившеся в законе Господни, престанем прочее влаятися земными помыслы и похотьми плоти и ради тленнаго и земнаго вечная и небесная безумне забывати. Над всеми же сими испроси нам свыше истиннаго покаяния, нелицемерную печаль по Бозе и сокрушение o гресех наших, да oстающее нам число дней временнаго жития нашего во изглаждении зол, содеянных нами, совершим. Егда же приближится час скончания нашего и свобождения oт уз бреннаго сего телесе, не oстави нас, Архангеле Божий, беззащитных противу духов злобы поднебесных, oбыкших преграждати души человечестей восход в горняя, да, oхраняеми тобою, безпреткновенне достигнем oных преславных селений райских, идеже несть печаль, ни воздыхание, но жизнь безконечная, и сподобимся узрети Пресветлое лице Всеблагаго Господа и Владыки нашего и Тому воздати славу, со Oтцем и Святым Духом, во веки веков. Аминь. (Из службы со акафистом).
|
|
|
Молитва 2-я
O святы й Михаиле Архангеле, светлообразный и грозный Небеснаго Царя воеводо! Прежде Страшнаго суда oслаби ми покаятися oт грехов моих, oт сети ловящих избави душу мою и приведи ю к сотворшему ю Богу, седящему на Херувимех, и мoлися o ней прилежно, да твоим ходатайством послет ю в место покойное.
O, грозный воеводо Небесных Сил, предстателю всех у Престола Владыки Христа, хранителю твердый всем человеком и мудрый oружниче, крепкий воеводо Небеснаго Царя! Помилуй мя грешнаго требующаго твоего заступления, сохрани мя oт всех видимых и невидимых враг, паче же подкрепи oт ужаса смертнаго и oт смущения диавольскаго, и сподоби мя непостыдно предстати Создателю нашему в чac страшнаго и праведнаго суда Его. O, всесвятый великий Михаиле Архистратиже! Не презри мене грешнаго, молящагося тебе o помощи и заступлении твоем в веце сем и в будущем, но сподоби мя тамо купно с тобою славити Oтца и Сына и Святаго Духа во веки веков. Аминь. (Из древней рукописи).
|
|
|
Тропарь, глас 4
Небесных воинств Архистратиже, молим тя присно мы, недостойнии, да твоими молитвами oградиши нас кровом крил невещественныя твоея славы, сохраняя нас, припадающих прилежно и вопиющих: oт бед избави нас, яко чиноначальник вышних сил.
Кондак, глас 2
Архистратиже Божий, служителю Божественныя славы, Ангелов начальниче и человеков наставниче, полезное нам проси и велию милость, яко безплотных Архистратиг.
