И отдельным оттиском: Повесть о граде Вятке. – Вятка, 1866

Въ лето 6682, во дни великаго князя Ярослава, сына Владимирова, отделишася от пределъ великаго Нова града житилие Новогородцы самовласцы з дружиною своею и шедше пловяху в судехъ внизъ по Волге реке и дошедше реки Камы и пребыша ту неколико время и поставиша на Каме градъ малъ во обитание себе, и слышаху о Вятке реке и иже по ней живущихъ Чюди Отяковъ, обладающихъ многими землями и угодьи, и земляные окопы и валы построиша кругъ жилищъ своихъ, боящеся находу Русии, а к поселению потребны и угодны и обладать ими от техъ языкъ не тягостны. И отделишася половина от техъ Новогородцевъ и идоша вверхъ по Каме реке до чусовскихъ местъ, другая половина остася на Каме реке в новопостроеномъ ихъ городке. Шедши же вверхъ по Каме реке и сшедъ на горы на страну ону и дошедше реки Чепцы, внизъ по ней пловуще, пленяюще Отятцкия жилища и окруженныя земляными валами ратию вземляще, и обладающе ими, и егда, исплывше тое реку Чепцу, внидоша в великую реку Вятку и плывуще по ней мало более пяти верстъ и узревше на правой стороне на высокой прекрасной горе устроенной градъ чюдской и землянымъ валомъ окруженъ, от реки же Вятки ровъ глубокой, от него же кругомъ землянымъ валомъ ископаннымъ рвомъ обведенъ, называемы Чуде Болвановской городокъ, иже ныне нарицается Никулицыно по реке Никуличанке. И видевше Новогородцы той градъ на прекрасной высокой горе, возжелаша ратию взяти его и обещашася прародителемъ своимъ Российскимъ великимъ княземъ страстотерпцемъ Борису и Глебу, и заповедаша всей дружине своей поститися, ни ясти ни пити, еже бы имъ получити той Болванской Чюдской градъ во обитание себе и ту селитву имети.

И приступивше к тому граду вельми жестоко и сурово призываху на помощь святыхъ страстотерпцевъ Бориса и Глеба и глаголюще: якоже иногда Новгородскому великому князю Александру Невскому даровали есте победу на супротивныя Шведы за рекою Невою явистеся пловущимъ в насаде, тако и ныне намъ пособъствуйте с молитвами вашими, и помощию всесильнаго въ Тройце славимаго Бога и предстательствомъ пресвятыя Богородицы, и ходатайствомъ святыхъ страстотерпцевъ великихъ князей Бориса и Глеба, той крепкий градъ взяша воинскимъ промысломъ в лето 6689-е месяца иулия въ 24-й день на память ихъ всероссийскихъ князей свят страстотерпцевъ Бориса и Глеба, и побиша ту множество Чюти и Отяковъ, а инии по лесомъ разбегошася, и по обещанию своему поставиша в томъ граде церковь во имя страстотерпцевъ Бориса и Глеба и нарекоша тои градъ Никулицынъ. И от того обладания новогородцы начаша множитися и размышляюще, еже бы имъ где в пристойномъ месте градъ свои построити местъ разсмотряюще.

Оставшим же Новогородцемъ в городке на Каме реке вниде в слухъ, яко дружина ихъ новогородцы обладаша на Вятке Чюдскими местами, воставше по Каме реке и внидоша во устие Вятки реки и идоша по неи вверхъ до Черемискихъ жилищъ и дошедше до Кокшарова городка обладаема Черемиссъ, и слышаху, дружина ихъ Новогородцы Божиею помощию и заступлениемъ святыхъ страстотерпцевъ Бориса и Глеба взяша на Вятке славной Болвановской городокъ, и они такожде обещашася и молебная пения Господу Богу воспевше призываху на помощь сродниковъ своихъ страстотерпцевъ всероссиискихъ князеи Бориса и Глеба и начаша ко граду приступати, и в другии день из града того жители побежаху, инии же граду врата отвориша, возвещающе граждане Новогородцемъ, что имъ показалось ко граду приступающе неизчетное великое воинство.

И тако Божиею милостию той Кокшаровъ городъ взяша и обладаша, и те Новогородцы распространишася и начаша жити на всей Вятской стране и посылаху о себе для уведения вверхъ по Вятке реке местъ усматривающе.

И абие снидошася посланнии от обою страну Новогородцевъ, свыше Вятки реки от Болвановскаго городка, иже ныне имянуемо по реке Накуличанке место оное Никулицыно, и снизу Вятки реки от Кокшарова городка названиемъ по речке Кокшаре, ныне же нарицается Котельничь, и межъ собою в разглаголствии другъ друга познавше и советъ объявляюще о усмотрении местъ, и тако согласившеся Новогородцы обладатели Болванскава городка и Кокшарова, где бъ имъ устроити общей единъ градъ и замокъ крепки во утверждение имети от нашествия супостатъ иноверцовъ Чюди и Отяковъ и Черемисъ и иныхъ народовъ.

И избравше место прекрасное над рекою Вяткою близь устия реки Хлыновицы на высокой горе, иже ныне зоветъся Кикиморская, место бо оно ко общему селению удобно и ис той горы преславно источники водъ истекающия мнози.

И по общему согласию во уреченную годину сошедшеся народи мнози Новогородцевъ ко оной горе начаша к созиданию града место устроити и древеса готовити располагающе какои созидати градъ. И заутра возставше обретоша некако Божиимъ промысломъ все изготовление пренесено по Вятке реке ниже на высокой паче пространнейшее место и широкое поле иже в то время нарицашеся балясково поле.

Новогородцы же со всею дружиною своею моляся Господу Богу и Его Богоматере пресвятей Богородице о показании места к созданию града хвалу возсылающе и молебная пения воспевше.

И на томъ месте вначале поставиша церковь Воздвижения честнаго и животворящаго креста Господня и градъ устроиша и нарекоша его Хлыновъ градъ речки ради Хлыновицы.

И тако Новогородцы начаша общежительствовати самовластвующе правими и обладаеми своими жители и нравы своя отеческия и законы и обычаи новогородския имяху на лета многа до обладания великихъ князей Россиискихъ и прозвашася реки ради Вятки.

Егда же Новогородцы построиша градъ Хлыновъ и жити начаша пришедше от перваго места з Болвановскаго города с Никулицына и обещаша святымъ страстотерпцемъ княземъ Россиискимъ Борису и Глебу вселетьнюю память творити, образъ ихъ святы с Никулицына во градъ Хлыновъ приносити и кругъ града хождение чинити и праздновати честне, дабы долгими леты и времены незабвены были бывшия чюдеса о поселении ихъ на Вятке. Еже и до ныне тое память объновляюще по вся лета празднующе.

Во времена же тыя князи Россиистие имущия отделныя грады прихождаху на Вятку с различными воинствы въ великомъ собрании киждо хотяше страну Вятскую взяти в подданство себе и ничто же успевающе. Наипаче же отъ Чюди Отяковъ и Черемисъ и от Агарянскаго народа розныхъ народовъ татаръ и бесермянъ и нагайцовъ снизу Волги реки и от Казанскихъ татаръ из Закамскихъ поселившихъся тии Новогородцы Вятчане многое утеснение имуще и раззорение, воюеми многажды и никако же обладаеми бяху. Во многи бо лета во граде Хлынове, где ныне Кремль градъ, построенъны жития жителей техъ кругомъ того города храмины другъ подле друга в близости задними стенами ко рву ставлены вместо городовой стены, понеже то место окружено от северной страны ископаннымъ рвомъ, а от запада и полудни преглубокимъ рвомъ, а с востоку от реки Вятки высокая гора. Избраша бо жителие такое угодное место, дабы от нашествия супостатъ в томъ городе быть свободно и ко отмшению угодно.

И егда во граде умножишася людие и поселились свободно, и тогда бояшеся нашествия супостатъ поставили острогъ кругомъ всего посаду, наченше с полуденнои стороны от глубокова рва где ныне выше винокурни словетъ Епиховъ потокъ и ведоша тотъ острогъ на северъ от глубокова жъ рва, где башня троеворотная, и построиша башни на проезжихъ дорогахъ, а далее того места кругомъ лесъ былъ, и в гору, что ныне Спенцынъская улица, не далеко от нынешней Воскресенъской церкви ходили в часчи леса по ягоды.

В та же лета с Устюга великаго и з Двини и от многихъ различныхъ странъ христиане приходяще в Вятскую страну поселишася мнози и святыя церкви в уездахъ по селамъ поставляюще. Черемиса же и Отяки и Чюдь набегающе со стрелами и окружаемъ многими селитвы раззоряюще и пленяюще.

Они же Вятские жители близъ града Никулицына на той же реке Никуличанке выше устроиша погостъ и поставиша церковь великомученика и победоносъца Георгия и нарекоша место оно Волково, а от Никулицына внизъ за Вяткою рекою заводиша поставить церкви Богоявления и Воскресения Господня, идеже ныне словетъ гарь студеная и воскресенская и поставлена часовня у реки Просницы близъ устия, и повселетнюю память и до днесь творяще в субботу пред пятдесятницею.

От набеговъ Чюди Отяковъ и Черемисъ те церкви в уезде не даша поставить.

Христиане же те святыя церкви Богоявленскую и Воскресенскую построиша во граде Хлынове, и по времяни когда наипаки умножися благочестие Богоявленскую церковь нарекоша соборную и ради частаго нашествия Чюди Отяковъ и Черемисъ обещашася Вятския града Хлынова и уездные жители великомученику страстотерпцу и победоносцу Егоргию по вся лета по дважды из села Волкова приносить образъ его святы во градъ Хлыновъ и встречать со освященнымъ соборомъ и со всемъ народомъ со свещами и праздновать и округъ града хождения уставиша. Еже и доныне пришествия святаго его образа великомученика Георгия по вся лета подважды бываетъ.

И во многи лета во объявление всему народу бывшее набежание Чюди Отяковъ и Черемисъ со стрелами воспоминающе, приносяще со образомъ великомученика Георгия стрелы окованы железомъ, и людие со свещами стрелы оные сменяюще, в память великомученика, избавления ради от набежания Чюди Черемисъ и Отяковъ и протчихъ неверныхъ народовъ бывшихъ со стрелами.

Пребывающе же они Новогородцы на Вятке никимъ обладаеми, самовластвующе по своей воли многия лета, имуще с собою на Вятке разныхъ градовъ пришедшихъ и поселившихся много норода.

Оставшиися же в Нове городе людие вознегодовавше на нихъ Вятчанъ зело и вадяще на нихъ княземъ Россиискимъ, оболгающе всяко и нарицающе ихъ из Нова града беглецами и раззорителями Россиискихъ князеи вотчинъ ихъ, дабы се бедъ Новуграду от Росиискихъ князей примирение и милость получити, наипаче же называху ихъ Вятчанъ разбойниками и отказные на нихъ великимъ княземъ подающе пишуще ихъ самоволниками.

Князи же россистии, по наваждению ихъ, посылающе по путемъ ратныхъ своихъ людей и недающе имъ в Новъ градъ возвратитися и наипаче согласитися.

Они же Вятчане бывше новогородцы, ту себе укоризну укрывающе, называшеся по ихъ Новогородцевъ оставшихься названию беглецами, и во отмщение укоризны ихъ приписаша, что бутто имъ из Новагорода на Вятку бежавшимъ зжившимъся з женами ихъ Новогородцевъ не прибывшимъ, а имъ Новогородцемъ бутто бывшимъ новоине посланнымъ из великаго Новаграда 7 летъ.

И сего во многихъ древнихъ летописцахъ нигдеже не обретаеться, написаша Вятчана во отмщение укоризны новогородцемъ, понеже из Нова града отлучишася с согласия Новогородцевъ и за повелениемъ ихъ. От сего же ихъ Новогородцевъ оставляющихся новаждения россистии князи и на Вятку посылаху рати мнози и ничтоже успевающе за разстояниемъ далнаго пути, наипаче же облежими Вятчане со всехъ странъ лесами многими и блаты и проходы к себе нужно имуще.

Во времена же она набежание частое на Вятку Черемисъ Отяковъ со стрелами и оружиемъ биваще, и начинающихъ христианъ селитися пленяюще и селитвы ихъ разоряюще. Наипаче же с Пижмы реки, что ныне въ Яранскомъ уезде, Черемиса для раззорения часто набегающе в волости Котельнича города. По реке жъ Кобре, от древнихъ повествуемо, христиане селитву зачинающе, имуще с собою святы образъ святителя Николая чудотворца написанъ в чудесехъ, и от нашествия Черемисы тыя христиане бежаще с реки Кобры лесами дикими и незнаемыми местами. И прешедъше реку, что ныне нарицаетъся Велика река, не ради величества оныя реки и наводнения, но ради великихъ чудотворении збывшихъся по ней имя оная река восприяла, взыдоша же тыя христиана на гору высоку и прекрасну зело и в густой часчи леса на той горе святы образъ Николая чудотворца неведомо како Божиими судбами оставиша.

И по времяни ономъ, егда восхоте Господь Богъ святителя чудотворца Николая образъ его святы явити чюдесне человекомъ новопоселившимся от разныхъ странъ и пребывающимъ в самовластии, скудно веру христианскую имущимъ и церквей в уезде нигде не имуще, сицевымъ смотрениемъ быти устрои.

В лето 6891-е от рожества Христова 1383-е, при великомъ князе Московскомъ Димитрие Ивановиче Донскомъ и при митрополите Пимине, до взятия Вятки из самовластия в подданство великихъ князей масковскихъ за 76 летъ, от града Хлынова внизъ по Вятке реке до устия Великия реки и вверхъ по Великой реке разстояния всего 40 верстъ, въскраи Великия реки, на прекрасной высокой горе идеже искипе источникъ водоточны, иже и доныне видимъ всемъ пиющимъ облегчения ради здравия.

Явися сице: некии благовернъ христианинъ близъ тоя горы селитву начиная, и еха на одну гору потребы ради своей и видитъ в густой часчи леса светъ велии сияющъ, и свещи мнози явишася, он же пришедъ на то светло сиящее место обрете и святы образъ великаго святителя Николая чудотворца, и вземъ со тшаниемъ и теплою верою сердечною и привезе но возале своемъ в домъ свой и постави вне на храмину свою, в неи же живяще, понеже в ново жить начинающе и храмины малы имуще и пред теми храминами забралъ не имуще. Въ томъ же дни человекъ некто христианинъ бе в болезни тяжце и слыша о образе святителя Николая, нача призывати его скораго помощника с теплою верою и абие внезапу получи скорое исцеление бысть здравъ яко николи же болевъ и позна себе скорое избавление от сея болезни милостию святителя Николая чудотворца ради его явившаго(ся) святаго образа, и бысть тотъ христианинъ паче верою теплейше и нача повсюду прославляти внезапное скорое исцеление сказоваше.

Слышаху же христиане начаша приходити к тому святому образу, носяще болящия, и скорое исцеление получаху, и пронесеся о семъ чюдотворномъ образе слава велика. И собрашеся христиане множество и спрасиша у начальствующихъ града Хлынова повеление и поставиша церковь малу во имя чудотворца Николая и в неи чюдотворны его святы образъ поставиша, и бысть паки от того образа чюдотворнаго чудесъ множайше.

По времени же довольне града Хлынова началственны освященнаго чина слышаху чюдеса многия бываху(емая) от образа Николая Чюдотворца, советовавше со всемъ освященнымъ соборомъ еже бы такое драгоценное богатство чюдотворны образъ принести во градъ Хлыновъ ради многонароднаго собрания.

Християне жъ тыя, иже имуще той чюдотворны образъ, нехоташе(ще) его разлучитися, со многими слезами моляше(иша) начальствуемыхъ града, еже бы имъ не лишеннымъ быти токоваго бесценнаго богатства.

Началствуеми градодержатели со всемъ освященнымъ соборомъ и со множествомъ народа едва упросиша у техъ христианъ за обещаниемъ своимъ, еже имъ по вся лета с темъ чюдотворнымъ святымъ образомъ из града Хлынова приходити на чюдотворное его место.

Во учрежденное же время шедше града Хлынова благоискусни священноначальницы принесоша чюдотворны тои святы образъ чюдотворца Николая с Великия реки во градъ Хлыновъ и поставиша в церкви в кремле городе построенной во имя его святителя Николая чюдотворца в лето 7059е, и по вся лета обещание свое исполняюще, с темъ чюдотворнымъ образомъ из Хлынова на Велику реку шествие творяще, еже и доднесь совершается хождение со множествомъ народа.

Священноначальницы градодержатели советующе, еже бы имъ ради многонародного собрания оущии праздникъ узаконити, и повелеша провозгласникамъ во многа дни на торгу всему миру объявляти, дабы по недели всехъ святыхъ первую неделю Петрова поста все христиане постилися и в пяты день, сиречь от святыя пасхи в девятую пятницу, праздновали во граде Хлынове святителю Николаю чюдотворцу и с чюдотворнымъ его образомъ великорецкимъ хождение кругъ всего града Хлынова учиниша с постомъ и молитвами чюдесъ ради бывающихъ от него, дабы христианскому народу чюдотворны образъ видимъ былъ и в день празднества всему народу узаконенный былъ ведомъ еже и доныне совершается.

 

В лето 6897-е великии князь Дмитрии Ивановичь Донскии преставился по немъ бысть сынъ ево великии князь Василии Дмитриевъ.

 

Во дни великаго князя Василия Димитриевича в лето 6899 Татарскии царь Токтамышъ посла царевича Бектута на Вятку ратию он же шедъ взялъ Вятку и людей посече а иныхъ в полонъ поведе а иныхъ на окупъ отдавалъ.

 

В лето 6929 на Вятке убиенъ бысть Айфалъ и сынъ ево Нестеръ от Михайла Росохина.

 

В лето 6964 великии князь Василей Дмитреевичъ послалъ на Вятку весною с княземъ Семеномъ Ряполовскимъ множество ратныхъ людей и ничто же успе воротились.

 

В лето 6967-е великии князь Василей Васильевичъ Московскии и всея России Вятскую землю взялъ и дань положилъ были самовластны 278 летъ.

 

В лето 6979 великии князь Василеи Васильевичь послалъ на Вятку Бориса Слепца веля имъ итьти на Двинскую землю воевати с ними же и Устюжаномъ велено итти а с ними былъ князь Иванъ Васильевичъ Оболенской.

 

Того жъ лета Вятчане шедшие Волгою весною въ судехъ на низъ взявши Сарай и множество татаръ взяша и поехаша прочь и пришедшу великому ветру и потопи вся струги и люди и ни единъ человекъ не вышелъ.

 

В лето 6985-е на Вятку прииде царь Казанскии без вести и много людей в полонъ взялъ по волостямъ а иныхъ посече града же ни единаго не взялъ и множество Татаръ подъ грады Вятчане побили и посла великии князь на весну силу свою на Казань воевати по Волге реке и множество ихъ плениша а Вятчане и Устюжана плениша по Каме реке Татаръ.

 

В лето 6997-е великии князь Иванъ Васильевичь послалъ на Вятку воеводъ своихъ князя Данила да Григорья Морозова с великою силою они жъ грады поимаша а Вятчанъ ко крестному целованию приведоша а болшихъ и лутчихъ людей з женами и з детми выведоша к Москве да и Вятскихъ князей. Великии князь Иванъ Васильевичь болшихъ людей пожаловалъ в Богоровскъ а иныхъ в Кременскъ розсадилъ и земли имъ подавалъ а торговыхъ людеи в Дмитровъ послалъ а князей Татарскихъ пожаловалъ отпустилъ к Вятке а крамольниковъ смертию казнилъ.

 

В лето 7007-е великий князь Иванъ Васильевичь послалъ воеводъ своихъ съ силою а Устюжаны съ Двиняны и Вычагжаны и съ Вятчанами на Угорскую землю и сповоеваша и князей поимаша а иныхъ къ роте приведоша и вси здрави возвратились.

 

В лето 7050-е ходила рать Казанская Татарская чрезъ Вятку на Устюгъ 40000 и повоевали много все городы около Устюга и волости и много зла сотвориша и в полонъ поведоша и пошла та сила Моломою рекою на плотахъ и собравшись все Вятские грады подъ Котельничь градъ и ту силу Татарскую на голову побили на Моломе толко ушла лесомъ Черемиса Луговая на Пижму реку.

 

Въ лето 7061 государь царь Иоаннъ Васильевичъ Казань взялъ и Болгары.