Міністэрства АДУКАЦЫІ РЭСПУБЛІКІ БЕЛАРУСЬ
УСТАНОВА АДУКАЦЫІ
«ГОМЕЛЬСКІ ДЗЯРЖАЎНЫ УНІВЕРСІТЭТ
ІМЯ ФРАНЦЫСКА СКАРЫНЫ»
В.І. ЯЦУХНА
ТЭОРЫЯ
ЛІТАРАТУРЫ
Дапушчана Міністэрствам адукацыі Рэспублікі Беларусь
у якасці вучэбнага дапаможніка
для студэнтаў філалагічных спецыяльнасцей устаноў,
якія забяспечваюць атрыманне вышэйшай адукацыі
ГОМЕЛЬ 2006
УДК 82.0(075.8)
ББК 83.0 Я 73
Я 94
Рэцэнзенты:
доктар філалагічных навук, прафесар, член-карэспандэнт НАН Беларусі М.І. Мушынск і — Інстытут літаратуры імя Я. Купалы НАН Беларусі;
доктар філалагічных навук, прафесар, загадчык кафедры тэорыі літаратуры Беларускага дзяржаўнага універсітэта В.П. Рагойша;
кандыдат філалагічных навук, дацэнт Л.І. Толчыкава — Гомельскі дзяржаўны абласны інстытут павышэння кваліфікацыі і перападрыхтоўкі кіруючых работнікаў і спецыялістаў адукацыі;
доктар філалагічных навук, прафесар, загадчык аддзела тэорыі літаратуры Інстытута літаратуры імя Я. Купалы НАН Беларусі М.А. Тычына;
|
|
доктар філалагічных навук В.К. Шынкарэнка — Гомельскі дзяржаўны універсітэт імя Ф. Скарыны.
Яцухна В.І.
Я 94Тэорыя літаратуры: дапаможнік для студэнтаў філалагічных спецыяльнасцей ВНУ / В.І. Яцухна; Міністэрства адукацыі Рэспублікі Беларусь, Гомельскі дзяржаўны універсітэт імя Ф. Скарыны.— Гомель: ГДУ імя Ф. Скарыны», 2006.— 279 с.
ISBN 985-439-162-0
У дапаможніку з улікам дасягненняў сучаснай літаратурнай навукі і практычнага вопыту выкладання дысцыпліны «Тэорыя літаратуры» ў вышэйшай школе змешчаны вучэбны матэрыял па курсу.
Дапаможнік з’яўляецца аб’яднаным і дапрацаваным варыянтам кніг «Тэорыя літаратуры: Вучэбны дапаможнік для студэнтаў-філолагаў. Частка І.— Гомель, 2002» і «Тэорыя літаратуры: Вучэбны дапаможнік для студэнтаў-філолагаў ВНУ. Частка ІІ.— Гомель, 2003».
УДК 82.0(075.8)
ББК 83.0 Я 73
ISBN 985-439-162-0 © В.І. Яцухна, 2006
© УА «ГДУ імя Ф. Скарыны», 2006
УВОДЗІНЫ
Тэорыя літаратуры як галіна навукі
Тэорыя літаратуры — гэта адна з галін літаратуразнаўства, якая займаецца тым, што выпрацоўвае сістэму навуковых паняццяў аб мастацкай літаратуры, а менавіта: акрэслівае прадмет літаратуразнаўства, вызначае яго будову (структуру), прасочвае сувязі прыгожага пісьменства з іншымі відамі мастацкай творчасці і галінамі грамадскага жыцця, выяўляе ўнутраныя разнавіднасці мастацкай літаратуры, фіксуе заканамернасці і формы гісторыка-літаратурнага развіцця. Плёнам сваіх назіранняў і высноў тэорыя літаратуры забяспечвае іншыя састаўныя часткі літаратуразнаўства (гісторыю літаратуры і літаратурную крытыку як дзве астатнія асноўныя галіны літаратуразнаўства, а таксама тэксталогію, бібліяграфію, гісторыю і метадалогію літаратуразнаўства і некат. інш. дапаможныя дысцыпліны). Спецыфіка тэарэтыка-літаратурнага пазнання ў тым, што яно займаецца не ўсебаковым і дэталёвым апісаннем канкрэтных літаратурных фактаў і з’яў, а выяўляе ў іх важнае, істотнае, заканамернае, характарызуючае адначасова цэлы шэраг аднатыпных фактаў і з’яў. Дадзенай акалічнасцю вызначаецца таксама і метадалагічная функцыя тэарэтыка-літаратурнага пазнання: тэорыя літаратуры не толькі абагульняе і сістэматызуе эмпірычны літаратурны матэрыял, а таксама стварае сістэму літаратуразнаўчых паняццяў і тэрмінаў, яна служыць яшчэ і асновай для ўзнікнення навуковых метадаў пазнання літаратуры.
|
|
Як любая галіна навуковых ведаў тэорыя літаратуры цесна звязана з іншымі дысцыплінамі, найперш сумежнымі — мастацтвазнаўствам і эстэтыкай, а таксама мовазнаўствам (лінгвістыкай). Шматстайныя сувязі ў тэорыі літаратуры з сацыялогіяй, гісторыяй, этыкай, этнаграфіяй, псіхалогіяй.
У працэсе выпрацоўкі сваіх паняццяў і тэрмінаў тэорыя літаратуры абапіраецца як на шматлікія мастацкія, філасофска-эстэтычныя і навуковыя традыцыі, выпрацаваныя чалавецтвам на працягу стагоддзяў, так і на вопыт сучасных мастакоў слова, крытыкаў, літаратуразнаўцаў, мастацтвазнаўцаў, філосафаў, лінгвістаў, сацыёлагаў і г. д.