2015-06-14
280
Ты, сыне мой, веждь о сем, яко тому царствованию Божию начало будет, конца же ему не будет; тамо бо никакова суперьника, ни противника, ратующаго противо Бога, не будет, но вся тогда будут мирна и безмятежна. А во предвечном Своем царствовании, аще и царствует всем Своим созданием, яко Бог бе и Творец всему Своему созданию, обаче не токмо диавол, но и человецы многая супротивления Богу творят и противо Его ратуют. И не токмо от неверных и незнающих Бога, но от избранных людей израильских супротивление великое Богу чиниша, ибо посланных от Него пророков побивали до смерти. И егда и Сам Господь Бог сшел к ним с небесе, еже призвати их во царство небесное, а они, вместо повиновения, во всем Ему противилися, и били, и всячески ругали, и не до сего ста: но, исполняя свою злую злобу, хотя Его, Творца своего, вечне обругати, на проклятом древе, то есть на кресте, распяша, дабы на Господе Бозе вечная клятва была, понеже писано бе, яко всяк на древе висяй проклят. Обаче Бог вопреки им зделал, ибо Своею Божиею властию и силою то их намерение обратил опако: се бо они сами осташася в вечном проклятии, а проклятое их древо, то есть крест, Господь Бог претворил из клятвы во благословение, и от безчестия превратил в великое почитание. Ибо так его Бог возвеличил и прославил и освятил, еже без него никакое действо не совершится, и святыня никакая не освятится, и диавол ничего тако не боится, яко креста святаго. И за такую их жидовскую злобу Господь Бог царство их разрушил, и, вместо обетованныя им земли, во всю вселенную расточил, и другуго тысящу лет скитаются по чужим странам, не имуще себе ни единаго града, ниже себе князя или вожда имеют, но яко скот заблудящий скитаются и корчмами питаются53. И егда жидове обезсилеша, тогда восташа идолопоклонники, и начаша тии Христу Богу противитися и верующих в Него великими и страшными муками умерщвляти, дабы Его Божие царство запустошити. А егда мучители исчезоша, тогда восташа на Бога проклятые еретицы. А ныне, в пособие тем богопротивным еретикам, восташа трепроклятии расколницы, и вси единодушно подвизаются, дабы им Божие царство разорити, а диаволскую власть распространити. И по всему сему мочно и малосмысленным людям разумети, яко ныне Бог не всеми царствует, но мнозии есть в мире сем Ему и противницы. И аще Бог и всемощен, мог бы, по Своей Божией власти, тыих Своих противников во едину минуту истребити: обаче, человеколюбия ради Своего, терпит им до втораго Своего пришествия. А по скончании сего света и по совершении суда Божия, вся та противности исчезнут, ибо диавол, со всеми своими угодники, заключен будет в бездне; и тогда ратовати противо Бога уже будет некому, но вся тогда будут мирна, и от всех святых и праведных токмо будет Богу благодарение и похвалное пение, и между собою любезное и беззавистное сожитие. И то Божие царствование начало имети будет, конца же тому царству уже не будет. Того бо ради святии отцы, на первый вселенский собор сошедшиися, в Символе и изложиша глаголати, яко "царствию Его не будет конца".
Егда же будеши той святый Символ окончевати и речеши: Чаю воскресения мертвых и жизни будущаго века, аминь, и, при том глаголе, в мысли своей имей, яко ждеши воскресения мертвых, еже вси умершии человецы, и в прах уже претворшиися, воскреснут и, по Господню словеси, сотворшии благая внидут в жизнь безконечную, в то вышепомянутое царство, а сотворшии злая пойдут со диаволом в пропасть адскую, на вечное мучение, идеже плачь и вопль будет великий, и тамо будут в безконечные веки веков мучитися.
И окончав той Символ, начни от себя молитву приносити Богу. Телесныма очима воззри на Спасителев образ, умныма же очима взирай на небо к Самому Богу и глаголи: "Госноди Иисусе Христе, Боже нашь, спаси и помилуй Государя нашего Царя и Великаго Князя Петра Алексеевича; и даждь ему, Господи, телесное здравие, и душевное спасение, и во благочестии утверждение незыблимое, в ратном деле поможение Гедеонское; тайныя враги его обнажи пред ним, явныя же прожени от него, а противящияся порази пред лицем его, и на предьбудущия супостаты даруй ему победу и одоление". И сотвори о нем три поклоны. А потом - за Цариц поклон, за Царевичей поклон, за Царевен поклон, за отца духовного поклон, за родного отца поклон, за мать родную поклон. И всех своих родственников и друзей воспомяни, и кто тебе какую добродетель ни зделал, всех в молитве своей воспоминай. А потом и о себе воспомяни, глаголя: "Спаси, Господи, и помилуй и меня, грешного и скверного раба Твоего, да не погибну аз окаянный за беззакония моя". И поклон. "И супругу мою [имярек], Боже человеколюбче, помилуй, да не погибнет беззаконий ради моих". И поклон. "И даждь нам, Господи, житие целомудренное и в христианстве неподвижное". И поклон. [А егда имети будеши чада, то и их поимянно поминай и по поклону за коегождо полагай]. [А последи глаголи:] "И всех, любящих мя и ненавидящих, спаси, Господи, и помилуй, да вси спасени будем". И поклон.
Потом, телесныма же очима зря на образ Пресвятыя Богородицы, а умныма очима такожде на небо зря, глаголи: "Пресвятая Госпоже Владычице Богородице, моли Сына своего и Бога о Государе нашем Царе и Великом Князе Петре Алексеевиче, еже бы подал ему здравие и спасение, и во благочестии утверждение, и на супостаты победу и одоление, и о откровении умных его очес, да возможет вся своя враги явные и тайные познати54, и во всяком деле правое и здравое разсуждение". И сотвори три поклоны. А по сем глаголи: "Заступи же, Пресвятая Мати Божия, и о благоверных Царицах, и о Царевичах и Царевнах". И за коеждо лицо полагай по поклону. По сем такожде, яко и выше речеся, воспомяни о отце своем духовном, и о родном, и о матери своей, и о друзьях и доброхотах. А потом рцы и о себе, глаголя: "Заступи же, Мати Божия, и о мне, грешном и скверном рабе Твоем, да не погибну аз окаянный за беззакония моя, и сожителница моя [имярек] да не погибнет беззаконий ради моих; и даждь нам, Пресвятая Мати Божия, житие целомудренное и во благочестии утвержденное" [аще будут дети, то и о них воспомяни]. [И потом глаголи:] "И всех, любящих и ненавидящих мя, спаси и помилуй, Пресвятая Дево Богородице, да вси, заступлением Твоим, спасение и наследие вечных благ получим". И сотвори три поклоны, или и за коеждо имя по поклону полагай.
По сем воззри на образ святаго Иоанна Предотечи, а умныма очима на душу его святую, стоящую у престола Божия на небеси, и глаголи: "Святый пророче и Предотече Христов Иоанне, моли Бога о Государе нашем Царе Петре Алексеевиче, и о Царице его Екатерине Алексеевне55, и о целомудренном житии их56; и о благородных Царевичах и о целомудренном житии их; моли же, святый пророче, и о мне, грешнем рабе твоем, и о супруге моей [имяреке], и о житии нашем целомудренном". И поклон. Такожде воззри очима своима на образ святаго Иоанна Богослова, умныма же очима воззри на небо и, самого его стоящаго у престола Божия зря, глаголи: "Святый Апостоле Христов и Евангелисте Иоанне Богослове, моли Бога о Государе нашем Царе Петре Алексеевиче, и о Царице его57, и о благовразумлении их58; и о благородных Царевичах и о благовразумлении их; и о мне, грешнем рабе твоем, и о сожителнице моей имяреке, и о благовразумлении нашем". И поклон. По сем такожде умные свои очи простри на небо и призывай в помощь себе святаго священномученика Власиа, глаголя: "Святый священномучениче Христов Власие, моли Бога о Государе нашем Царе Петре Алексеевиче, и о Царице его59, и о благополучении их60; и о Царевичах и о благополучении их; и о мне грешнем, и о супруге моей [имяреке], и о благополучении нашем". И поклон. По сем призывай себе в помощь святаго Спиридона Чудотворца, глаголя: "Святый святителю, отче Спиридоне, моли Бога о Царе нашем Петре Алексеевиче, и о Царице его61, и о утверждении во благочестии62; и о Царевичах и о утверждении во благочестии63; и о мне грешнем, и о сожителнице моей [имяреке], и о утверждении во православии нашем". И поклон. По сем такожде проси святаго Онуфриа Великого, глаголя: "Преподобне отче Онуфрие Великий, моли Бога о Царе нашем Петре Алексеевиче, и о Царице его64, и о оставлении грехов их65; и о Царевичах и о оставлении грехов их; и о мне грешнем, и о сожительнице моей [имяреке], и о оставлении грехов наших". И поклон. На окончании же сиих молений призови святую великомученицу Варвару, глаголя: "Святая великомученица Христова Варвара, моли Бога о Царе нашем Петре Алексеевиче и о Царице его66, да не постигнет их67 незапная смерть, ни болезнь; и о Царевичах, да не постигнет их незапная смерть, ни болезнь; моли же Бога, святая великомученица, и о мне грешнем, и о супрузе моей [имяреке], [а аще будут ти дети, то во всех молениях воспоминай и их имяна, глаголя:] и о чадех наших [имяреках], да не постигнет и нас всех незапная смерть, ни болезнь, и да не погибнем". И поклон.
И паки проглаголи Отче нашь, единожды, и зря очима на образ Спасов, умом же зря к Самому Спасу на. небо, глаголи: "Господи и Владыко человеколюбче, не отвержи мене от лица Твоего, и Духа Твоего Святаго не отъими от мене, и настави мя на дела благая и душеполезная; и отверзи ми, Боже, ум, еже разумети Святая Твоя Писания, да от неведения своего не погибну аз окаянный". И поклон. По сем воззри на образ Пресвятыя Богородицы, умныма же очима воззри на Самое Ее, на небеси сущую, у престола Божия стоящую, рцы: "Пресвятая Мати Божия, моли Сына своего и Бога о откровении ума моего, и о благословении начинаний моих, и низпослании свыше помощи Его в делех моих, и о оставлении грехов моих, и о получении вечных благ". И поклон. По сем на образ святаго ангела хранителя своего зря, умом же о нем помышляй, яко ту при тебе он стоит, и глаголи: "Ангеле Божий, хранителю мой святый, моли Бога о оставлении грехов моих, и о откровении Божественного Писания, и о получении вечных благ; и в настоящий сей день, и во грядущую нощь, [а аще в вечеру имаши сие глаголати, то ты глаголи: "в настоящую сию нощь и во грядущий день",] и во вся дни живота моего сохрани мя от всякого зла, да не погибну аз за беззакония моя". И поклон. По сем призывай себе в помощь тезоименного своего блюстителя, глаголя: "Святый святителю, отче Николае, моли Бога о оставлении грехов моих и о получении вечных благ. О, тезоименниче мой, не остави мя от заступления твоего, да не погибну аз окаянный за беззакония моя". И поклон. А аще тыих святых, их же о заступлении своем молиши, образов ту несть, идеже ты молитву дееши, или и есть, да ты не веси, идеже они написаны: то ты взирай умом своим на небо и призывай их в помощь себе, а поклонение хвори образу Спасителеву, понеже Сам Он, Господь Бог, рек, яко Он во святых живет и святии в Нем, Бозе нашем, пребывают (Иоан. глава 17, стих. 21 и 22-й). И по тому Господню словеси, и во образе Спасителеве всех тыих святых, их же ты молиши, образам быти непщуй, в Нем бо вси святии, по глаголу Господню, обретаются.
И паки проглаголи Отче нашь, единожды, и зря телесныма очима на образ Спасителев, умом же к Самому Спасителю Богу нашему взирая, глаголи: "Помяни, Господи, прежде отшедших благочестивых наших Царей, и Цариц, и Царевичей, и Царевен, и святейших патриархов". И поклон. Потом поминай преставльшихся дедов и бабак своих, и прочиих своих сродников, и доброхотов своих, их же хощеши. И поклон. А по смерти нашей, и нас не забывай и по поклону полагай за нас. Потом рцы: "И всех православных христиан, от века преставльшихся, помяни, Господи, во царствии Своем всегда, ныне и присно, и во веки веков, аминь". И поклон.
По сем проглаголи Богородице Дево, радуйся, единожды, и зря умом своим на небо, глаголи: "Пресвятая Госпоже Владычице Богородице, не оставь всех нас, на прилежное Твое моление уповающих, да за беззакония наша не погибнем". И поклон. Таже "Достойно есть", или "О тебе радуется", или случившагося праздника задостойник. И поклон. А потом "Господи помилуй", трижды, и "благослови". Окончевая же, проглаголи молитву: "Госноди Иисусе Христе, Боже нашь, помилуй нас, аминь". И сице правило свое отправя, что ти требе, то и управляй.
5. Сие же, сыне мой, памятствуй, еже бы, во время своего правила, ни о чесом тебе не размышляти и посторонних словес не глаголати, но токмо едину молитву отправляти; и о том токмо и да помышляеши, о чесом у тебя моление идет. И аще диавол, ненавидяй чистые молитвы, замешает чем, или наведением каковаго размышления из памяти твоея выгонит, и проглаголеши в безпамятствии своем, понеже диавол, пресекая твое возвеждение ума на небо, в забытие ума твоего приведет тя, и еже глаголал не упомниши: то ты паки начни ю глаголати снова. И аще вторицею, или и третицею, или и вящши, ум твой диавол отведет какими размышленми от богомыслия, то ты вся та глаголания ни во что себе вменяй, но токмо ту молитву счисляй, кую проглаголеши в самой своей твердой памяти, с богомыслием, иже ум твой во время кия молитвы будет пред Самем Богом на небеси. А кая у тебя молитва отправится не тако, то ни во что ти она вменится, понеже Бог ту токмо молитву приемлет, кую человек глаголет от истиннаго своего намерения, с богомыслием, то есть с возведением умных очес на небо, пред Самого Содетеля нашего Бога; а кую молитву глаголет кто в забытии ума своего, и та молитва до Бога не доходит, но на воздусе демони ю расторгают. Такоже и поклоны тыи пропадают, кии без возведения мысли своея на небо кто отправляет; но токмо тии и поклоны до Бога доходят, кии, такожде яко68 и молитву, кто отправляет з богомыслием, во время своего поклонения мысль свою возводит на небо пред Самого Бога.
6. И сего ради ты, чадо мое, велми умом своим, яко во время молитвы, тако и во время поклонов буди бодр, понеже и поклон твой той истинный явится, егда телом своим поклонишися видимому образу Божию, а невидимою душею - невидимому Богу, на небесех сущему, и, по евангельскому Господню словеси, истинный поклонник явишися. Тако бо Господь рек, яко истиннии поклонницы поклоняются Отцу духом и истинною (Иоан. глава 4, стих 23). И таковых истинных поклонов69, ни телом без духовного намерения, ни духовным намерением без телесного труда, никоими делы не можно исправити, кроме случая тяжкия болезни телесныя. Сие бо люторове держат ради своея преизлишние лености, или паче ради самыя их люторския гордости, еже поклонов телом не творят. И не токмо им во время служения церковного поклоны творити, но от презельныя своея гордости и стояти не хощут, но седят по креслам, яко разслабленнии, или паче, яко бездушные и недвижимые идолы. Тако бо они возгордеша и обленишася, еже не хощут нимало тела своего потрудити, или бы его, ради спасения своего, удручити; и ради Бога не хощут и единаго своего члена двигнути, ибо и крестного воображения не хощут на себя возложити. Ради же угождения диаволу, на вечеринках, в богомерзских танцах, тако себя удручают, что едва с душею собираются и, тако утрудившися, спят даже до обеда; и то их житие стало быть не христианское, но самое языческое. И таковых ради своих богомерзских трудов, поклоны Богу отправляют токмо единым своим помышлением, и те свои мнимые поклоны нарицают истинными поклоны. Нас же, православных, во многотрудных наших поклонех, иже издревле от преемников апостольских уставленные, порокуют и глаголют, якобы мы противно святому Евангелию чиним, еже мы поклоны с трудом плоти своея отправляем. И в том своем глаголе ссылаются на вышепомянутое Господне слово, реченное Самаряныне. И в том своем мудровании они, люторане, велми обезумишася, понеже Господь не отрек телесного поклона, но еще и прирек, глаголя: вы не весте, ему же кланяетеся, мы же [рече] вемы, ему же кланяемся; и сей глагол Христов не отречение от поклонов, но приречение. И паки рек: грядет час, и ныне есть, егда истиннии поклонницы поклонятся Отцу духом и истинною, то есть, с истинным намерением духовным и богомыслием. И еще прирек, глаголя: таковых бо Отец ищет покланяющихся Ему; Дух есть Бог и ищет кланяющихся Ему духом и истинною. И вся Своя та глаголы закрепил Господь сиим глаголом, еже рек: достоит кланятися (стих 24); а того не рек, еже бы не достоило кланятися. И по вышеписанному глаголу Господню, мочно было и люторанам уразумети, яко Господь не отрече поклонов; не рек бо того, еже бы токмо единым помышлением людие кланялися Богу [яко же лютораня блядословят]. Господь бо нимало не назначил, еже бы не подобало телесного поклона творити. Господь не поклон отрек, но отрек место, глаголя, яко ни во Иерусалиме, ни в горе сей поклонятся истиннии поклонницы. Кто же суть истиннии поклонницы? Яве есть, яко тии, иже кланяются Богу с богомыслием; ибо Господь не пришол разорити закон, но исполнити. Поклон бо телесный уставлен есть издревле, при первом Божием пророце Моисеи, и Господь той древний телесный поклон, во пришествии Своем на землю, пополнил, ибо к тому древнему поклону приложил Господь и духовный поклон, то есть богомыслие. Поклонению же плотскому и Сам Христос показал нам образ, ибо, пред волною Своею страстию, в вертограде, пад на землю, моляшеся (Марк. 14, 35; Лук. 22, 41). А лютораня не хощут и с места своего двигнутися, но, сидя в креслах и на главы своя возложа парики, о поклонех токмо умом своим помышляют и то свое помышление за истинный поклон вменяют. Самаряныне бо Господь ясно изъявил, глаголя, яко истиннии поклонницы поклонятся Богу духом и истинною. Понеже древле кланялись токмо видимою плотию, без богомыслия, и той поклон был яко тело без души; а Господь, во пришествии Своем, той поклон оживотворил: яко в мертвое тело душу вложил, тако в той телесный поклон вложил Господь духовный, и бысть поклон сугубый. Яко тело з душею, тако и поклон с богомыслием; и яко тело без души и душа без тела не действителна, тако и поклон телесный без духовного, подобне и духовный без телесного, ничто же есть; и той-то одушевленный поклон, по Господню словеси, стал быти истинный. А люторове напрасно, от гордости своея и от великия лености, той истинный поклон одушевленный отставили и хощут токмо единым духом поклоны отправляти, то есть, единым токмо помышлением хощут их исправити, и мнят себе и спасение вечное от таковых поклонов получити. Ни! Соблазнились бо они, весма неправо сие мудрование себе изложиша. Яко бо душа не может без телесного труда спастися, тако и поклоны мнимые, без телесного труда, ползовати человека не могут, но токмо - едина блазнь.
И аще кто, на люторское баснословие зря, соблазнится, и той сам себе да разсудит. Аще кто токмо единым своим умом помыслит о поклоне, и еже бы то помышление приял Бог и за истинный поклон вменил бы: и по тому их умствованию, и воздаяние во грядущем веце прияти им70 будет токмо единой душе, без тела; а телу, за роскошное житие, по Господню словеси надлежит быти во тме кромечной; или паче, по самому их разсуждению и по высокому их умствованию, во царствии небеснем быти единому токмо уму, понеже в посте и молитве и в поклонех трудился токмо един их ум, а тело з душею нимало труду не причастилося. Понеже Господь Бог призывает к Себе во царство небесное всех труждающихся и обремененных игоношениями; тех токмо обещался Господь упокоити (Матф. гл. 11, ст. 28); а ленивому рабу и неключимому наследия во царствии небеснем не будет, но таковых повелел Господь ввергнути во тму кромечную, и прирек, глаголя: тамо будет плачь и скрежет зубом (Матф. гл. 25, ст. 30). И по вышеписанному Господню словеси, како не трудившемуся плотию внити с плотию во царство небесное? У люторан ум токмо с помышленми своими трудитца, то и наследие во царстве небеснем получит токмо ум един с помыслами своими; а телу и з душею искать места токмо в геене. Обаче и уму быти во царстве небеснем не можно, понеже Господь не уму упокоение обещал, но человеком труждающимся и бремена носящим; а не труждающимся и ленивым, кроме вечные муки, иного нечего ждати. Сие бо есть чудно, еже лютораня хощут одним токмо помышлением спасение себе соделати. Ни, ни! Никогда бо помышление, без совершенного труда и игоношения, спасти человека и в вечный покой ввести не может. И поклоны люторския мнимыя не ино что, токмо сонное мечтание. То бо есть истинный поклон, аще кто кланяется плотию, по вышеписанному изъявлению, с богомыслием.
7. И того ради, во время поклонов, отнюд никакова суетного помышления не подобает в мысль свою влагати. А аще от забвения, или паче от диаволя ловления, из мысли твоея, сыне мой, богомыслие исторгнется: то ты, егда опамятуешися, еже без богомыслия поклон един, или два, или и множае сотворил, то подобает тебе те поклоны вновь отправити. А буде и вторицею диавол из мысли твоея, каким ни есть мирским помышлением, радостным или печалным, исторгнет, то ты паки снова начни; и аще и до многих крат препинати ти будет, паки снова начинай. Донележе без всякого замешания, с совершенным богомыслием, отправиши поклоны свои или молитву свою, то до тех мест снова все начинай и исправляй, дабы диавол не радовался о замешании молитвы твоея или поклонов твоих, творимых Богу и Пресвятей Его Матери и прочиим святым угодникам Божиим, но радовался бы о исправлении твоем ангел Господень, хранитель твой святый. Понеже тем твоим многократным ко исправлению возвращением, ненавидящаго богомыслных поклонов и чистые молитвы, диавола посрамиши и от себя проженеши; а еже множае ко исправе возвращатися будеши, то болшую и мзду от Бога приимеши. О сем бо и царь Давид предрек, глаголя: пойте Богу, пойте разумно (Псалом 46, стих 8); то есть, не просто языком пой, но и разумом своим разумей, что поеши и кому поеши. И аще ум твой от пения твоего будет неотлучен, то та твоя молитва, и пение, и поклоны будут Богу угодны. А аще не тако, то тще твое пение, тща и молитва, тщи и поклоны твои будут. Святый Иоанн Златоустый о молитве тако глаголет: яко аще ты не чуеши, ни разумееши, еже глаголеши, то и Бог ту молитву не услышит; язык твой глаголет, а ум твой не весть, что глаголеши, и той твой труд вотще будет. Согласно же сему и святый апостол Павел глаголет: аще бо [рече] помолюся языком, и дух мой молится; а аще ум без плода [то есть, аще не помышляет того, еже глаголет], то что убо есть [рече]? Но помолюся духом, помолюся и умом; воспою духом, воспою же и умом (1 Коринф. глава 14, стих 14). Таковыя-то, чадо мое, молитвы, и пения, и поклонов требует Бог, дабы и дух совокупно с умом и с языком молился. И сего ради, аще речеши токмо: "Господи, помилуй", то и во едином том глаголе ум свой возведи на небо, пред Самого Бога, и глаголи не единым токмо языком, но и умом к Самому Богу вопий. И аще с богомыслием речеши токмо: "Господи, помилуй", то той твой глагол приятнее Богу будет паче всецелого канона, без богомыслия глаголанного.
8. И аще, сыне мой, хощеши услышан Богу быти, то всякое свое моление и прошение возноси к Самому Богу на небо, яко же выше речеся. И тако творя, услышан будеши. И аще прошение твое на ползу тебе имать быти, то даст тебе Бог; а аще же будет ти не на ползу прошение твое, то, за теплое твое к Богу моление, Господь Бог, оберегая тебя от погибели впредь будущия, не послет ти того, его же ты просиши по своему намерению. Понеже ты не веси, что от того впредь случится, а Господь Бог вся весть, чему быть. И того ради ты, сыне мой, не скорби, аще не по прошению твоему что деется; токмо ты всю свою надежду возвержи на Господа, и что ти ни даст, о том и благодарен буди. Мой же совет буди тебе, сыне мой, сицев, еже бы ти никаковыя вещи, на сем свете сущия, с прилежным71 прошением у Бога не просити: но токмо да будет твое прилежное72 прошение о откровении Божественного Писания, и о оставлении грехов твоих и жены твоея и детей твоих, и о получении царства небесного. О сем бо Сам Господь Бог научает нас, глаголя: не пецытеся, что ясти, или что пити, или во что одеятися [всех бо сих языцы ищут]; весть бо Отец вашь небесный, яко требуете всех сих; но, рече, ищите прежде царства небесного и правды его, и сия вся приложатся вам (Матф. глава 6, стих 31; Лук. глава 12, стих 30). И аще истинную любовь имети к Нему будеши, то ни о чесом не пекися; к тому же аще и надежду свою всю возложиши на Его Божию волю, то уже ты ни о чесом не пецыся: Бог бо все житие твое управит, и еже ти ни дарует, то вся та на ползу ти будут. И аще найдет на тя какая и беда, малая или и великая, не убойся, ни усумнися: без Божия бо воли ничто тебе не случится. Аще ты виновен, то грех твой тою бедою очистится; а аще невиновен, а ты благодарно претерпиши, то сугубый ти венец от руки Божия соплетется. И о такой беде безвинной подобает ти великою радостию радоватися: то самое твое доброе счастие будет, аще в том злоключении смерть себе приимеши, понеже со святыми мученики венец себе приимеши, и диавола, якоже и Иов многострадальный, весма победиши.
10. Еще же тебе, чадо мое, завещеваю: егда ты будеши пред образом Божиим молитву к Богу возсылати, и в то время ни о чесом не размышляй и на стороны не поглядывай; но стой яко столп неподвижен, ум же свой весь впери на небо пред Самого Бога. И аще73 у тебя в то время тело твое воззудеет, не моги двигнутися или почесатися; а аще утерпети от воззудения не можеши, то ты на мал час молитву свою премолчи и, почесався, пави молитвуй; и аще и блоха начнет тебя копошити, всячески потерпи. Аще же странной человек о какой либо нужде приидет к тебе что рещи, то в молитве своей премолчи, и аще самая его нужда, то исправь нужду его, и паки молитву дей. А аще домовой твой приидет к тебе и о чесом либо вопросит тебя, и ты, не окончав начатые молитвы, кая во устех твоих случится, ничесого не отвешчевай, дабы твоя молитва была без препятия. А аще же диаволским каковым умышлением, или людским докучанием, или своим размышлением, или забвением, какая твоя молитва препята будет: то ты74, исправяся, паки начни ее и бодрственно соверши ю, еже бы без всякого препинания исправити ти. И аще и вторицею, или и третицею смешается твоя молитва, и ты паки в тое же врёмя, или неколикое время и премедлив, снова начни с опасным охранением, дабы ти тую свою молитву к Богу возслати без препятия.
11. А егда ты, чадо мое, пойдеши ко церкви, то, токмо встуипя в церковную ограду, шапку с себя или и иное какое покрывало со главы своея сойми, яко днем, тако и нощию, да не явишися пред Богом горд. Понеже Бог гордым противится, смиренным же благодать Свою дает (Притч. глава 3, стих 34), а церковь есть дом Божий. Зри всяк и на сие: егда кто взыдет на двор некоего властелина, то и тут, отдаючи ему честь, шапки с себя снемлют; колми же паче подобает Божий дом почитати!
Каков ты богат ни будеши, или честию от царя возвышен, а пред Богом нищ и убог еси, и яко прах и пепел под ногама Его. И сего ради пред Богом всячески себя смиряй и буди пред Ним яко последний убогий человек: не стыдись ради почитания Божия шапку с себя снимати, вблиз святыя церкви пришедши. А и на всяком месте Господу Богу своему и образу Его святому отдавай честь достолепную. И аще узриши образ святый несомый с пением, то такожде, якоже и вблиз церкви, шапку со главы своея сойми и поклон отдай ему75 достодолжный. А аще же узриши несомо святое Тело Христово, то лише чють завидиши его, то шапку с себя сойми, и с коня своего или с колесницы сниди, и егда приближится к тебе, и аще и грязно, поклонись до земли. И аще и не в церковь идеша, ниже на молитву, но токмо минуеши вблиз святыя церкви, то, не сняв с себя шапки, не моги минути ея. И аще у церкви снаружья и несть образа написанного, обаче ты, зря на церковь, а наипаче на святый олтарь, возложив на ся крестное воображение, поклон сотвори. А аще, во время твоего минутия, услышиши или узриши, еже во церкви литургию отправляют, то сотвори ты к церкви три поклоны и тако минуй ю, понеже литургиа есть дело великое: в ней бо, ради оставления грехов наших, Агнец Божий закалается и в жертву Богу приносится.
12. А егда внидеши во святую церковь на молитву, то, вшед, первее сотвори Спасителеву образу три поклоны. Чувственныма очима зря на образ Спасителев, умныма же очима зря на Самого Бога, на небесех сущаго, глаголя в себе: "Господи Боже мой, помилуй мя грешного", и сотвори поклон до пояса. И паки глаголи: "Господи Боже мой, прости ми согрешения моя", и поклонись такожде. И паки третицею глаголи: "Господи Боже мой, управи молитву мою во спасение", и поклон третий сотвори. По сем, чувственныма очима зря на образ Пресвятыя Богородицы, умныма же очима такожде зря на самую Богоматерь, на небесех сущую, у престола Божия стоящую, глаголи в себе: "Пресвятая Госпоже Богородице, помилуй мя грешнаго", и поклон сотвори, подобный первым. И паки глаголи: "и заступи о мне грешном Сыну своему, Богу нашему", и вторый поклон сотвори Пресвятей Богородице. Зря же на образ, его же есть храм, и аще случится храм святаго Иоанна Богослова, то, на образ его зря, ум свой возведи на небо и глаголи в себе: "Святый возлюбленниче и наперстниче Христов Иоанне Богослове, моли Бога о оставлении грехов моих", и сотвори поклон. И аще коего святаго ни случится церковь, глаголи в себе: "Святый апостоле Христов", или "святый святителю", или "святый мучениче Христов", или "преподобне отче нашь", имярек, "моли Бога о оставлении грехов моих", и сотвори ему поклон. И, отправя тыи поклоны, поклонись первее архиерею; а аще архииерея несть, то поклонись презвитеру; и аще он во олтари, то ко олтарю поклонись; и потом - людям, стоящим во церкви. И, поклонясь, стани на месте неподвижен.
Мета же себе во церкви не избирай и, стоя, о стену или и об ыное что не опирайся, кроме немощи телесныя, или древности престарелыя. А аще и в старости, а можеши стоять о себе, то стой не опершися. И жезлом, разве немощи телесныя, отнюд не подпирайся76; а аще в бодрости, то и в руках жезла или тростки, по обыкновению малосмысленных, не держи. Аще и в чине хотя, афицерском или судейском, будеши, трости отнюд в руках своих не держи, стоя во церкви77, но отдай ее слузе: понеже в церковь вошол ты молитися, а не судить кого, или поучение тростию кому чинити. Такожде и шпагу или саблю, не вошед в церковь, сняв с себя, отдай слузе, дабы тебе тем оружием, поклоны творя, не избости кому ока, или и иной какой досады не учинити. Немцы аще и ходят в церквы своя со шпагами, и они нам не пример: у них вера особая от христианския отличилася и порядок весь у них особой. Они, вшед во свою церковь, поклонов не токмо земных, но и поясных не творят, но на уготованных своих седалищах сидят, и стало им свободно не токмо со шпогою, но и со олебардами внити во церковь78. И каковое бы он оружие ни внес с собою в церковь, никому ничего им не учинит: понеже, седши на своем седалищи, хотя перед собою поставит его, хотя за собою, хотя на колени себе положит, да смотрит на него. А наше древнего христианства обыкновение - не оружие острое в церковь вносити, но острую молитву к Богу, еже бы все небеса пробивала и подножия Божия касалася. И ты, сыне мой, аще у какова дела строптивого либо будеши во управлении, то у дела царскаго за царские секреты стой, являяся яко лев; во церковь же вшед, буди яко кроткая овца, и того и смотри, еже бы тебе и грудью своею не потеснить кого, а не то, чтобы шпагою, поклонившися, кого убости.
