Из Продолжения «Летописца начала царства»

<...> Поезд болшой государя царя и великого князя Ивана Васильевича всеа Русии. Тоя же зимы, декабря в 3 день[87], в неделю, царь и великий князь Иван Васильевича всеа Ру­сии с своею царицею и великою княгинею Марьею[88] и с своими детми, со царевичем Иваном и со царевичем Феодором, поехал с Москвы в село в Коломенское и празником Николы чюдотворца празновал в Коломенском. Подъем же его не таков был, якоже преже того езживал по манастырем молитися, или на которые свои потехи в объезды ездил: взял же с собою святость, иконы и кресты, златом и камением драгим украшеные, и суды золотые и серебряные, и постав­цы[89] все всяких судов, золотое и серебряное, и платие и денги и всю свою казну повеле взяти с собою. Которым же бояром и дворяном ближним и приказным людем повеле с собою ехати, и тем многим повеле с собою ехати з женами и з детми, а дворяном и детем боярским выбором из всех горо­дов, которых прибрал государь быти с ним, велел тем всем ехати с собою с людми и с конми, со всем служебным наря­дом[90]. А жил в селе в Коломенском две недели для непогодия и безпуты, что были дожди и в реках была поводь велика и кры в реках прошли[91].

И как реки стали, и царь и государь ис Коломенского по­ехал в село в Танинское декабря в 17 день, в неделю, а из Тонинского к Троице, а чудотворцову память Петра митро­полита, декабря 21 день, празновал у Троицы в Сергиеве монастыре, а от Троицы из Сергиева монастыря поехал в Слободу[92]. На Москве же тогда быша Афонасий митрополит всеа Русии, Пимин архиепископ Великого Новаграда и Пъскова, Никандр архиепископ Ростовский и Ярославский и ины епископы и архимандриты и игумены, и царевы и ве­ликого князя бояре и околничие и все приказные люди; все же о том в недоумении и во унынии быша, такому государьскому великому необычному подъему, и путного его шествия не ведамо, куды бяше.

А генваря в 3 день прислал царь и великий князь из Сло­боды ко отцу своему и богомолцу к Офонасию митрополиту всеа Русии с Констянтином Дмитриеевым сыном Поливанова с товарыщы да список, а в нем написаны измены боярские и воеводские и всяких приказных людей, которые они измены делали и убытки государьству его до его государьского воз­расту после отца его блаженные памяти великого государя царя и великого князя Василия Ивановича всеа Русии. И царь и великий князь гнев свой положил на своих богомолцов, на архиепископов и епископов и на архимандритов и на игуменов, и на бояр своих и на дворецкого и конюшего и на околничих и на казначеев и на дьяков и на детей бояр­ских и на всех приказных людей опалу свою положил в том, что после отца его блаженные памяти великого государя Ва­силия при его государстве в его государьские несвершеные лета, бояре и все приказные люди его государьства людем многие убытки делали и казны его государьские тощили[93], а прибытков его казне государьской никоторой не прибавливали, также бояре его и воеводы земли его государьские себе розоимали, и другом своим и племяни его государьские земли роздавали; и держачи за собою бояре и воеводы по­местья и вотчины великие, и жалования государьския корм­леные емлючи[94] и собрав себе великие богатства, и о госу­даре и о его государьстве и о всем православном християнстве не хотя радети, и от недругов его от Крымского и от Литовского и от Немец не хотя крестиянства обороняти, наипаче же крестияном насилие чинити, и сами от службы учали удалятися, и за православных крестиян кровопролитие против безсермен и против Латын и Немец стояти не похотели. И в чем он, государь, бояр своих и всех приказных лю­дей, также и служилых князей и детей боярских похочет которых в их винах понаказати и посмотрит и архиепископы и епископы и архимандриты и игумены, сложася з бояры и з дворяны и з дьяки и со всеми приказными людми, почали по них же государю и великому князю покрывати. И царь и государь и великий князь от великие жалости сердца, не хотя их многих изменных дел терпети, оставил свое государ­ство и поехал, где вселитися, идеже его, государя, бог наста­вит. К гостем же и х купцом и ко всему православному крестиянству града Москвы царь и великий князь прислал гра­моту с Костянтином Поливановым, а велел перед гостьми и перед всеми людми ту грамоту прочести дьяком Путилу Михайлову да Ондрею Васильеву. А в грамоте своей к ним писал, чтобы они себе никоторого сумнения не держали, гневу на них и опалы никоторые нет. Слышав же сия преосвя­щенный Афонасий митрополит всеа Русии и архиепископы и епископы и весь освященный собор, что их для грехов сия сключишася, государь государьство отставил, зело о сем оскорбеша и в велице недоумении быша. Бояре же и околничие, и дети боярские и все приказные люди, и священниче­ский и иноческий чин, и множества народа, слышав таковая, что государь гнев свой и опалу на них положил и государь­ство свое отставил, они же от многого захлипания слезнаго перед Офонасием митрополитом всеа Русии и перед архи­епископы и епископы и пред всем освященным собором с плачем глаголюще: «Увы! горе! како согрешихом перед бо­гом и прогневахом государя своего многими пред ним согре­шении и милость его велию превратихом на гнев и на ярость! ныне х кому прибегнем и кто нас помилует и кто нас изба­вит от нахожения иноплеменных? како могут быти овцы без пастыря? егда волки видят овца без пастуха, и волки восхи­тят овца, кто изметца от них? такоже и нам как быти без государя?» И иная многая словеса подобная сих изрекоша ко Афонасию митрополиту всеа Русии и всему освященному собору. И не токмо сия глаголюще, наипаче велием гласом молиша его со многими слезами, чтобы Афонасий митропо­лит всеа Русии с архиепископы и епископы и со освященным собором подвиг свой учинил и плачь их и вопль утолил и благочестиваго государя и царя на милость умолил, чтобы государь царь и великий князь гнев свой отовратил, милость показал и опалу свою отдал, а государьства своего не отстав­лял и своими государьствы владел и правил, якоже годно ему, государю; а хто будет государьские лиходеи которые изменные дела делали, и в тех ведает бог да он, государь, и в животе и в казни его государьская воля[95]: «А мы все свои­ми головами едем за тобою, государем святителем, своему государю царю и великому князю о его государьской мило­сти бити челом и плакатися».

Также и гости и купцы и все гражане града Москвы по тому же биша челом Афонасию митрополиту всеа Русии и всему освященному собору, чтобы били челом государю царю и великому князю, чтобы над ними милость показал, госу­дарьства не отставлял и их на разхищение волком не давал, наипаче же от рук сильных избавлял; а хто будет государьских лиходеев и изменников, и они за тех не стоят и сами тех потребят.

Митрополит же Афонасий, слышав от них плачь и стена­ние неутолимое, сам же ехати ко государю не изволи для градскаго брежения, что все приказные люди приказы госу­дарьские отставиша никим же брегомы, и послал к благоче­стивому царю и великому князю в Олександровскую слободу от себя того же дни, генваря в 3 день, Пимина архиепископа Великаго Новаграда и Пъскова да Михаилова Чюда архи­мандрита Левкию молити и бити челом, чтобы царь и ве­ликий князь над ним, своим отцом и богомолцем, и над своими богомолцы, над архиепископы и епископы, и на всем освященном соборе милость показал и гнев свой отложил, такоже бы над своими бояры и над околничими и над казна­чеи и над воеводами и надо всеми приказными людми и надо всем народом крестиянским милость свою показал, гнев бы свой и опалу с них сложил, и на государьстве бы был и своими бы государьствы владел и правил, как ему, государю, годно; и хто будет ему, государю, и его государьству измен­ники и лиходеи, и над теми в животе и в казни его государь­ская воля. А архиепископы и епископы сами о себе бити челом поехали в Слободу царю и государю и великому князю о его царской милости: Никандр архиепископ Ростовьской, Елуферей епископ Суздалской, Филофей епископ Рязянской, Матвей епископ Крутитцской, Троецкой Сергиева монастыря архимандрит Меркурей, Спаской архимандрит Галахтион, Симановской архимандрит Феоктист, Андроньев­ской архимандрит Иосиф. Бояре князь Иван Дмитреевич Белской, князь Иван Федорович Мстиславской и все бояре и околничие, и казначеи и дворяне и приказные люди многие, не ездя в домы своя, поехаша с митрополичья двора из го­рода за архиепископом и владыками в Олександровскую сло­боду. Такоже гости и купцы и многие черные люди со многим плачем и слезами града Москвы поехали за архиепископы и епископы бити челом и плакатися царю и великому князю о его царьской милости. Пимин же архиепископ Великаго Новаграда и Пскова да Чюдовский архимандрит Левкия при­ехав в Слотино и обослалися в Слободу, как им государь велит очи свои видети. Государь же им повеле ехати к себе с приставы; приехаша же в Слободу генваря в 5 день. Архие­пископ же Пимин и архимандрит Левкия государю от митрополита Афонасия благословение и челобитие исправили. Архи­епископы же и епископы, архимандриты и игумены соборне преже биша челом благочестивому царю и великому князю Ивану Васильевичу всеа Русии о себе, чтобы их государь пожаловал, очи свои велел им видети; и царь и великий князь их пожаловал, очи свои видети им велел. Они же преже биша челом о себе, чтобы государь милость свою им показал, гнев свой с них сложил; потом же биша челом царю и великому князю отцом его и богомолцом Афонасием митрополитом всеа Русии, чтобы государь для отца своего и богомолца Афонасия митрополита всеа Русии и всего освященнаго собора милость свою показал, велел очи свои ви­дети бояром и приказным и опалу бы свою им отдал и государьствы своими правил, как ему, государю, годно. И многим молением молиша его со слезами о всем народе крестиянском, якоже преди изрекохом.

Благочестивый же государь царь и великий князь Иван Васильевич всеа Русии, милосердуя о всем православном крестиянстве, для отца своего и богомолца Афонасия митро­полита всеа Русии и для своих богомолцов архиепископов и епископов, бояром своим и приказным людям очи свои ви­дети велел и архиепископом и епископом и всему освящен­ному собору милостивое свое жаловалное слово рек: «для отца своего и богомолца Афонасия митрополита всеа Русии моления и вас для своих богомолцов челобитья государьства свои взяти хотим, а как нам свои государьства взяти и государьствы своими владети, о том о всем прикажем к отцу своему и богомолцу к Офонасию митрополиту всеа Русии с своими богомолцы». И тогда же в Слободе архиепископом повеле празновати на Богоявление господне и отпустил их к Москве к отцу своему Афонасию митрополиту. А остави у себя бояр князя Ивана Дмитреевича Белского да князя Петра Михайловича Щенятева и иных бояр, а к Москве того же дни генваря в 5 день, отпустил бояр князя Ивана Федо­ровича Мстиславского, князя Ивана Ивановича Пронского и иных бояр и приказных людей, да будут они по своим при­казом и правят его государьство по прежнему обычаю. Че­лобитье же государь царь и великий князь архиепископов и епископов принял на том, что ему своих изменников, кото­рые измены ему, государю, делали и в чем ему, государю, были непослушны, на тех опала своя класти, а иных казнити и животы их и статки[96] имати; а учинити ему на своем государьстве себе опришнину, двор ему себе и на весь свой оби­ход[97] учинити особной, а бояр и околничих и дворецкого и казначеев и дьяков и всяких приказных людей, да и дворян и детей боярских и столников и стряпчих и жилцов учинити себе особно, и на дворцех, на Сытном и на Кормовом и на Хлебенном, учинити клюшников и подклюшников и сытников и поваров и хлебников, да и всяких мастеров и конюхов и псарей и всяких дворовых людей на всякой обиход, да и стрелцов приговорил учинити себе особно. А на свой обиход повелел государь царь и великий князь, да и на детей своих царевичев Иванов и царевичев Феодоров обиход, городы и волости: город Можаеск, город Вязму, город Козелеск, город Перемышль два жеребья, город Белев, город Лихвин обе половины, город Ярославец и с Суходровью, город Медынь и с Товарковою, город Суздаль и с Шуею, город Галичь со всеми пригородки, с Чюхломою и с Унжею и с Коряковым и з Белогородьем, город Вологду, город Юрьевец Поволской, Балахну и с Узолою, Старую Русу, город Вышегород на Поротве, город Устюг со всеми волостьми, город Двину, Карго­поле, Вагу, а волости: Олешню, Хотунь, Гусь, Муромское селцо, Аргуново, Гвоздну, Опаков на Угре, Круг Клинской, Ординские деревни и стан Пахрянской в Московском уезде, Белгород в Кашине, да волости Вселук, Ошту, Порог Ладошской, Тотму, Прибужь. И иные волости государь поимал кормленым окупом[98], с которых волостей имати всякие до­ходы на его государьской обиход, жаловати бояр и дворян и всяких его государевых дворовых людей, которые будут у него в опришнине; а с которых городов и волостей доходу не достанет на его государьской обиход, а иные городы и волости имати.

А учинити государю у себя в опришнине князей и дворян и детей боярских дворовых и городовых 1000 голов; и по­местья им подавал в тех городех с одново, которые городы поимал в опришнину; а вотчинников и помещиков, которым не быти в опришнине, велел ис тех городов вывести и подавати земли велел в то место в ыных городах, понеже оприш­нину повеле учинити себе особно. На двор же свой и своей царице великой княгине двор повеле место чистити, где были хоромы царицы и великие княгини, позади Рожества Пре­чистые и Лазаря Святаго, и погребы и ледники и поварни все и по Курятные ворота; такоже и княже Володимерова двора Ондреевича место принял и митрополича места. По­веле же и на посаде улицы взяти в опришнину от Москвы-реки: Чертолскую улицу и з Семчиньским селцом и до всполья, да Арбацкую улицу по обе стороны и с Сивцовым Врагом и до Дорогомиловского всполия, да до Никицкой улицы половину улицы, от города едучи левою стороною и до всполия, опричь Новинского монастыря и Савинского монастыря слобод и опричь Дорогомиловские слободы, и до Нового Девича монастыря и Алексеевского монастыря сло­боды; а слободам быти в опришнине: Ильинской, под Сесенками, Воронцовской, Лыщиковской.

И которые улицы и слободы поимал государь в оприш­нину, и в тех улицах велел быти бояром и дворяном и всяким приказным людям, которых государь поимал в опришнину, а которым в опришнине быти не велел, и тех ис всех улиц велел перевести в ыные улицы на посад. Государьство же свое Московское, воинство и суд, и управу, и всякие дела земские, приказал ведати и делати бояром своим, ко­торым велел быти в земских: князю Ивану Дмитреевичю Белскому, князю Ивану Федоровичю Мстиславскому и всем бояром. А конюшему и дворетцскому и казначеем и дьяком и всем приказным людем велел быти по своим приказом и управу чинити по старине, а о болших делах приходити к бояром; а ратные каковы будут вести или земские великие дела, и бояром о тех делах приходити ко государю, и госу­дарь с бояры тем делом управу велит чинити.

За подъем же свой приговорил царь и великий князь взяти из земского сто тысячь рублев; а которые бояре и воеводы и приказные люди дошли за государьские велике измены до смертные казни, а иные дошли до опалы, и тех животы и статки взяти государю на себя. Архиепископы же и епископы и архимандриты и игумены и весь освященный собор, да и бояре и приказные люди то все положили на го­сударьской воле.

Тоя же зимы, февраля месяца, повеле царь и великий князь казнити смертною казнью за великие их изменные дела боярина князя Олександра Борисовича Горбатово да сына его князя Петра, да околничево Петра Петрова сына Головина, да князя Ивана княже Иванова сына Сухово-Кашина, да князя Дмитрея княже Ондреева сына Шевырева. Бояр же князя Ивана Куракина, князя Дмитрея Немово по­веле в черньцы постричи. А дворяне и дети боярские, кото­рые дошли до государьские опалы, и на тех опалу свою клал и животы их имал на себя; а иных сослал в вотчину свою в Казань на житье з женами и з детми.

Хрестоматия по истории СССР. XVI-XVII вв. – М.: Изд-во соц.-эконом. лит-ры,1962. – С.138-145. - №36