Петр скарга

Оборона сбору Берестейского¹

(отрывок)

Яко кождая речь добрая и светая маеть своего спротивники, а всюды неприятель межи пшеницу свой куколь розсевает, так и светые вселенские сборы духовных, на которых се правда Божая и згода зба-венная христианская утвержает, николи без обмовцов и потворцов не были. Претож не див, и тот сбор поместный Берестейский маеть теж своих подсевачов, которые чистую пшеницу его хочут спросным на-сеньем повести и удаванья омьшьного заразить. Яко се деяло в правде и без жадного прымешанья омыльного слова — вже се поведило. Маю

¹ Памятники полемической литературы Западной Руси. Кн. 3. Русская историческая библиотека Т. 19., СПб., 1903. С. 228-236. Текст оригиналь­ный, шрифт современный. Обработка А.А. Козела.

Раздел III

в Пану Богу надею, иж каждый баченя побожного и мудрого придеший будет до веры тому, што так светые и мудрые презвитери Божыи и еписко-пи обоих церквей Заходнее и Всходнее приносят, и так великие, зацные и побожные послове короля его милости ознаймуют. Однак, на оборону того то собору здало се нешто преложить верному християнству, которые до конца прав церковных и поступков ее старых, з Греками звлаща, сведоми не суть, а книг не мають, або читать прав и деяний церковных не могут. Иж тот собор порядне и правне згромажоный был.

Роздел 1.

Порядне, водле Бога и прав Божих и церковных, тот светый собор Берестейский в Христе згромажоный был. Бо росказаный есть от най-высшого пастыра всего християнства папы (Рымского) Клеменса Осмо-го, который сам не только такие, але и вселенские соборы всих на свете епископов складает, и оные потвержает, без которого призволенья жа­ден собор порядный и моц маючий быть не может. Деел се теж тот со­бор з ведомостью его милости князя архиепископа Гнезненского, Станислава Карнковского, яко примаса и найвысшого в том королев­стве духовного преложоного. Приступило до того дозволенье короля его милости, без которого в паньстве его жадному подданному сзъездов и громад чинить а не годить, — а не толко позволене, але и выправа послов на тот собор, для спокойного речей духовных отправованя.

Были теж на нем особы до собору власне належачые, то есть: (ар-хиепископи,) епископи або владыки, которые сами правом Божим на том трыбунале соборовом власть мают. Бо они сами суть, яко писмо мовит (в Деяниях Апостолских 20), «от Духа Светого поставени, абы рядили церковью Божою, которую откупил кровью Своею». Иные теж з собою свещенники и презвитеры, учоные и побожные привели, не для судов и заседаня, але для помочы и рады. Были теж и светские з рамени короля его милости и иные добровольне прыеждаючые.

Зобралсе теж тот собор на речь светую и збавенную и потребную. Не иж бы веру становил, або о артыкулах ее выклады давал (бо то са­мым вселенским собором и зо всего християнства зобраным еписко­пом належит), але жебы то выконали, што через послы свое до отца светого папежа всказали, и што им поручоно было. То есть: абы зъе-хавшисе, съединёние веры светое и вси ее артыкулы и члонки вызна­ли, и руками своими подписали, хотечы так научат, яко от апостолов светых подано, и в писме светом умоцнено, и од отцов светых старо­житных Греческих и Латинских сукцесыею и вступованьем порядным

Философская мысль Беларуси периода Речи Посполитой

зоставлено, одметаючи новины и науки геретыцкие, здавна од отцов светых проклятые, и иные якокольвек против повшехной и старожыт-ной науце католической повстаючые. А ктому абы отдали послушен-ство навысшому пастыру, потомку апостола Петра светого, и напотом стерегучысе отщепенства, в едности тела церкви Божое жыли. Нако­нец абы взяли розгрешенье з отщепенства патриярхов Царогородских, а напотом, покуль ее с костелом светым не злучат и не зъеднают, в следы и приклады предков своих вступуючы, абы з ними сполков жадных не мели. На тые тры светые речы згромажоный, тот собор учи­нил всим досыт, и за помочью Божою тое статечне выконал.

А иж противники наболей на то крычат, иж от патриярьхи Царого-родского отступили, а с тым се светским людем и посполитым не оповеде-ли: даст се им справа статечная о том и доводная. Тое только преложывши, яко вправде есть: иж тые противники о то не дбают, и не тое их болит, иж од Царигородского патриярхи владыкове отступили (бо ведают, и назбыт ведают, який там неряд, и знищенье, и невольство, и грех); иж отгуль жад­ное потехи и помочы до справ церковных не мают; иж на той столицы сами светокупцы седят, а до них николи жадного учоного и побожного слать не могут, бо их не мают; одно голодные на пенези а убогие, а часом шалберы, у которы за троху золота и сукна купить всю веру, и достоенства, и владыцства, и розгрешеня, яких кому потреба; и которые послами се от патриярхи чынят, а не суть, обороны жадное до веры и науки и рядов цер­ковных задержаня не дают, але речей все лакомством и для пенезеи меша­ют, а иногды хресгиянские справы Турком вьщают; лечь им и то идет, и то их болит, иж се владыкове злучили с костелом светым Рымским, где наука и побожность християнская цвите.....